Ramón Pérez de Ayala tornó a Uviéu, y fíxolo de la mano d'Ignacio Zuloaga. El Muséu de Belles Artes d'Asturies amuesa dende'l 4 de xunu y hasta'l 29 d'agostu'l retratu que l'artista de Éibar fixo del intelectual asturianu en 1931.

El cuadru llega a Asturies dientro del programa de la "Obra convidada" del Muséu de Belles Artes, y fáelo cedíu temporalmente por Carmen Pérez de Ayala, nieta del escritor, políticu y periodista que na presentación de la obra confesóse "chiflada" por tar na tierra del so güelu. "Nun soi asturiana pero sí me siento asturiana", aseguró enantes d'afirmar que "el Muséu de Belles Artes faime un gran favor, ye un placer poder tar equí, nel sitiu onde tien que tar esti cuadru".

Amás del llenzu, na sala 18 del edificiu ampliación del Belles Artes, puede vese una pequena amuesa del archivu de Pérez de Ayala que ta depositáu na Biblioteca d'Asturies, que lleva'l so nome. En dos vitrines pueden vese distintes fotografíes de Pérez de Ayala mesmo que dellos documentos, ente ellos delles cartes qu'intercambió con Zuloaga con motivu del retratu.

El director del Muséu de Belles Artes, Alfonso Palacio, apuntó que se trata de "un maraviyosu cuadru, retratu d'otru estraordinaria personaxe". Palacio repasó los pormenores del cuadru, pintáu en 1931, "cuando empieza'l periodu de madurez del artista como retratista". El cuadru ta enllenu de mensaxes. La inminente proclamación de la II República, que tanto defendió Pérez de Ayala, nos llibros qu'apaecen nel suelu xunto al sillón nel que posa l'intelectual, faise referencia a la República. Tamién nel xarrón de flores que completa la escena y que contien tulipanes mariellos, moraos y colloraos, los colores de la bandera republicana. La mesma pose de Pérez de Ayala tien tamién una importante connotación política. "L'intelectual mira escontra la esquierda, per onde enfusa la lluz de la nueva era, d'esa república" que se diba proclamar el 14 d'abril.

El director de la Biblioteca d'Asturies "Ramón Pérez de Ayala", Juan Miguel Menéndez, recordó que'l so primer trabayu como bibliotecariu fai 31 años consistió en catalogar l'archivu de Pérez de Ayala qu'acababa d'incorporase a la biblioteca. Esi archivu ta compuestu por 4.000 volumes y 130 caxes con manuscritos, semeyes, cartes o retayos de prensa. Una mínima parte amuésase nel Belles Artes xunto al cuadru de Zuloaga.

Precisamente esa collaboración ente la Biblioteca y el Belles Artes foi destacada pol director xeneral de Cultura del Principáu, Pablo León Gasalla, que recordó qu'apocayá se cumplieron 90 años de la proclamación de la república y que "el cuadru reflexa l'optimismu d'aquella dómina".