Na xíriga arqueolóxica llámase "tesorillo" pero lo que s'atopó na cueva de La Cuesta, en Berció (Grau) ye una auténtica ayalga. Son un total de 209 monedes romanes d'ente los sieglos III y V depués de Cristu. Les pieces fueron depositaes nel Muséu Arqueolóxicu d'Asturies, onde se presentaron el miércoles 16 de xunu.
Alfonso Fanjul, ún de los arqueólogos responsables del afayu xunto a Antonio Juaneda y Roberto García, calificáronlu de "escepcional", yá que al marxe de la calidá y cantidá de pieces, estes monedes permiten afirmar qu'a mediaos del sieglu V, ente'l fin del imperiu romanu y la instauración del reinu d'Asturies, había movimientu internacional de monedes romanes qu'aportaba hasta Asturies. Les monedes vienen d'Antioquia, Constantinopla, Tesalónica, el Sur de Francia y hasta Londres, esta postrera, una sola moneda, la de mayor tamañu, de mediaos del sieglu IV.
Fanjul esplicó que l'afayu producióse casi por casualidá. Antonio Juaneda, nun percorríu fotográficu peles orielles del ríu Nalón atopó una cueva abrigu de grandes dimensiones y que podría ser interesante dende'l puntu de vista arqueolóxicu. Avisó a los sos collacios y entamaron una visita magar que'l llugar ta bien malu p'allegase. Al aportar, los arqueólogos atoparon en suelu un sumidoriu natural que remata nuna lloriga, posiblemente d'un melandru, apuntó Fanjul. L'animal “pinchó” un depósitu de monedes y delles salieron a la superficie. Ellí, en suelu, atopáron los investigadores un total de 115 monedes. Darréu comunicárenlo a la conseyería de Cultura que-yos concedió los permisos y el financiamientu pa facer una escavación d'urxencia. Nesta primer campaña atopáron el restu de les pieces.
Foi too perrápido, como esplicó'l director xeneral de Cultura y Patrimoniu del Principáu, Pablo León Gasalla. El pasáu 5 d'abril la conseyería recibió la comunicación del afayu, ente los díes 13 y 25 del mesmu mes fixo la escavación arqueolóxica de la zona y el 27 d'abril apurrieron les monedes al Muséu Arqueolóxicu.
Magar que lo atopao, sorrayó Fanjul, supón, pol númberu de monedes, “la mayor ayalga de pieces romanes atopada nuna cueva n'España”, los investigadores creen qu'esti “tesorillo” formaba parte “d'un depósitu muncho mayor del qu'atopemos la sobra”.
La directora del Muséu Arqueolóxicu d'Asturies, María Antonia Pedregal, celebró l'afayu y el so depósitu nel Muséu. Amás, recordó que'l pasáu 8 de mayu presentárase tamién nel Arqueolóxicu la espada de Sobrefoz, de 3.000 años d'antigüedá y que foi donada por Victoria Blanco del Dago
