A los sos 56 años el mierense Ángel París enfundó per primer vegada'l monu y el cascu que lu acrediten como obreru de la construcción va unos meses namás. Hasta agora dedicara tola so vida llaboral a la hostelería. En cuerpu y alma. Mesmo como autónomu que como asalariáu. Llegó a axuntar más d'una trentena d'años cotizaos alredor de la barra de chigres, sidreríes o cafeteríes. Tuvo una hamburguesería nel centru de Mieres que cerró va cinco años y dende entós púnxose a trabayar pa otros. Pero hubo un día que cansó. Foi en plena desescalada, cuando les terraces de los chigres empezaron a recibir veceros otra vuelta. “Teníes qu'andar pegándote cola xente por que se punxeren el mázcaru, por que caltuvieren la distancia de seguridá...”, esplica. Acabó fartu. Asina qu'un día restolando pente los cursos del Serviciu Públicu d'Empléu atopó ún que-y llamó l'atención. Nun tenía nada que ver colo que fixera hasta agora. Yera de revestimientu de parés. Apuntóse y seis meses depués d'entamar ta trabayando nuna obra del barriu de La Florida d'Uviéu. “Toi de pintor”, presume, “va unos meses nun sabía nin poner un lladriyu, agora yá faigo hasta obres en mio casa”. 

La construcción rexonal allampia por personal. Fai-y falta con urxencia mano d'obra nuevo pa consiguir siguir creciendo y nun s'afogar. Lleva demandandolo va tiempu la patronal asturiana d'esti sector la CAC-Asprocon qu'asegura que-y cuesta horrores atopar trabayadores cualificaos, especialmente mozos, p'atender a la elevadísima demanda que se-yos axunta. Nin siquier la Fundación Llaboral de la Construcción (FLC) llogra completar los cursos qu'ufierta. Y eso que les posibilidaes de trabayar son enormes. Señala Kike Riesgo, sociu director de la empresa asturiana Fida Consultores y especialista en reclutamientu de personal, qu'ún de los problemes del sector ye qu'hubo munchos emplegaos que dexaron esta actividá va años –na crisis del lladriyu en 2008– y “yá atoparon la so recualificación n'otros sectores, reinventáronse y pue que yá nun puedan o quieran retornar a la construcción, siquier pel momento, hasta verificar que'l repique s'afita y nun queda nun picu flor d'un día”. Anque al calor d'estes nueves posibilidaes llaborales, dalgunos yá tán optando por volver. 

A Ángel París plasmólu atopar un empléu tan rápido. “A la mio edá nun contaba con que naide me fora a contratar”, señala. Agora comparte andamiu –anque ye un dicir porque tán dedicaos a xeres de pintura– col llenizu Ismael Ahilagas García, de 45 años, que sí que tenía esperiencia nel sector, pero que llevaba un tiempu alternando trabayos con planes d'empléu y dalgún periodu nel paru. Mientres esos tiempos muertos nel desempléu nun quedó aparáu, siguió formándose. Ensin fuelgu. “El sector camudó nestos últimos años, yo creo que, pa bien, agora abulta que vuelve haber trabayu, hai bastantes obres”, asegura'l llenizu. Ye más, mira con ciertu optimismu al futuru. “Pel momento vamos tar trés meses nesta obra y si lo facemos bien dixéronnos que tenemos opción de garrar otra nel futuru”, destaca. 

El xixonés César Fernández tien 22 años namás y ye parte del sangre nuevo que se ta incorporando al puxante sector constructor. Vien tamién de la hostelería, onde trabayó como camareru, pero vio nel lladriyu una gran oportunidá pa encontiar el so futuru llaboral. “Nun tenía nin idea del oficiu, foi'l mio padre'l que m'animó”, esplica. Atopar empléu nun-y costó munchu tiempu. Namás acabar un cursu na FLC yá taba nel andamiu. Como peón. Y, asegura, con aspiraciones de siguir xubiendo escalones nel sector.