–Silenciu. Cámara graba. Secuencia 56b. Planu 12. Toma 3 –diz J. K. Álvarez col güeyu na cámara, que se mueve con suavidá sobre una exa. La vida volvió esti día a la plaza de toros de Buenavista tres los años ensin corríes nin conciertos. L'actor Valentín Paredes, de traxe granate, crucia les puertes pintaes de color coloráu esllucíu y avérase a la cámara con pasu grave. Detrás, un cartelu de “Anís de la Asturiana”, recuerda que'l coso taurín d'Uviéu lleva abandonáu demasiao tiempu. El galán de los setenta foi'l protagonista de la xornada nuna plaza de toros que, a la espera de que lleguen les máquines pa da-y una segunda vida, quedó como decoráu apocalípticu pa la industria del cine pola so característica más vergoñosa, la ruina.
Entre toma y toma, el director asturianu J. K. Álvarez esplica que foi una fotografía del aspeutu interior de la plaza la que lu llevó a querer utilizar Buenavista como decoráu pa la so película “Camping Movie: el secreto de la Cruz de la Victoria”. “A la d'escribir el guión yá m'imaxinaba esta escena equí, anque nun sabía si sería posible consiguilo”, indica nel descansu. El so equipu de producción llogrólo. Punxéronse en contactu col Ayuntamientu, qu'esanició bona parte de los árboles y la maleza que crecíen sobre'l sable por que'l rodaxe pudiera llegar a Uviéu. Foi un trabayu de maquillaxe. Nos graderíos del coso siguen llevantándose los árboles. Pelos pasiellos interiores del coso, abonden los lladriyos desprendíos, los tablones de madera escaecíos y les semeyes desconchaes d'antiguos toreros. La película, que tien como exa central la Cruz de la Victoria, ruédase íntegramente en localizaciones d'Asturies, munches abandonaes. “Daqué que rima col personaxe qu'interpreta Valentín (Paredes)”, apunta'l director.
L'actriz vallisoletana Sandra Velázquez, una de les protagonistes de la cinta, amosaba'l so entusiasmu poles localizaciones. “Toi redescubriendo Asturies”, cuenta nos pequenos descansos que faen ente tomes y pa fuxir del calor. Esti día pela mañana, nel centru del sable, el sol yera insoportable. L'equipu, veníu na so mayoría de fora del Principáu quexábase amargamente. J. K. Álvarez, anque ye asturianu y conoz la meteoroloxía local llamentaba “esperar agua y tar asina”. A Valentín Paredes, los técnicos de maquillaxe ensugáben-y el sudu pa siguir col rodaxe y l'encargáu del soníu de la cinta dicíase “a puntu del desmayu”. Y ún de los actores bromiaba diciendo qu'el “Goya” merecía'l sufrimientu. Pero, al mediudía, la cosa torcióse y la nube obligó a cancelar el restu del día.
Pero la mañana foi abondo pa encontiar la escena que va suponer “el clímax” d'una película que se va estrenar ente'l branu y la seronda de 2022. La cinta tuvo que retrasase por causa de la pandemia. “Por prudencia”, esplicaba'l director. Cola desescalada, l'equipu púnxose manes a la obra pa rodar la película. N'acabando, marchen a la siguiente localización de la cinta, el Palaciu de Bimenes. El futuru de la plaza, primero de llegar a les pantalles del cine, tendrá de pasar por un proyectu de reforma que-y quite'l so actual y únicu atractivu, l'abandonu.
