María Calvo Carvajal (Xixón, 1975) foi la primer muyer n'asitiar (2008) al mandu de la empresa familiar Construcciones San Bernardo, en 2014 asumió la presidencia del grupu de promotores de la patronal asturiana de la construcción (CAC-Asprocon), en 2015 convirtióse en vicepresidencia tercera de l'Asociación de Promotores y Constructores d'España (APCE) y en xineru de 2018 aportó a la vicepresidencia de la Federación Asturiana d'Empresarios (FADE), un cargu que nunca enantes desempeñara una muyer. Agora, y si la base electoral de la patronal rexonal sofitara la decisión unánime del conseyu executivu de FADE y del so presidente saliente (Belarmino Feito), Calvo convertiríase non más tarde de setiembre na primer presidenta de la patronal rexonal nes sos 44 años d'hestoria.
L'arrenunciu de Feito a optar a un nuevu mandatu y la so retirada antemanada y voluntaria ensin llegar a escosar los cuatro años pa los que foi escoyíu en xineru de 2018 (una decisión confirmada por él mesmu esti día na asamblea añal de FADE) abrió la carrera pola sucesión, anque Feito y el comité executivu prefieren zarrar rápido'l procesu y postularon yá a Calvo pa empobinar los destinos de la patronal.
Feito, presidente de la compañía metalúrxica Asturfeito, y Calvo conectaron nel branu de 2017, cuando'l primeru decidió postulase pa suceder a Pedro Luis Fernández, presidente de GAM y qu'arrenunció a un segundu mandatu en FADE. Feito tenía'l respaldu de Femetal (la patronal metalúrxica) y buscó'l sofitu de CAC-Asprocon. Dambes organizaciones sectoriales fueron determinantes (colos sos alcuentros y desencuentros) na configuración del poder en FADE nesti casi mediu sieglu. CAC vio bien la operación y Feito ufiertó a la construcción un puestu de relevancia: Calvo foi la escoyida pa ocupalu y dende esi momentu forxóse un bon entendimientu alredol de les directrices, estratexa y xestión de la Federación Asturiana d'Empresarios.
Calvo, madre de dos fíos y llicenciada en Derechu y Alministración d'Empreses por ICADE y máster pol Institutu d'Empresa, desenvolvió tola so vida llaboral na empresa de la familia, dedicada a la promoción y construcción de vivienda, tres una etapa de vacilación previa na que se preparó un tiempu p'aportar al oficiu de corredor de comerciu.
Fía d'Eloy Campo Capellín –un exdirectivu de Banesto en Xixón que fundó Construcciones San Bernardo nos años 80 en xubilándose de la banca y que foi presidente del Sporting de Xixón–, l'actual vicepresidenta de FADE incorporóse, tres aquel amagu inicial, a la empresa paterna, na que pasó a formar equipu col so hermanu –Eloy Calvo, arquiteutu– tres el fallecimientu del proxenitor. Na actualidá ye directora xeneral y accionista de la sociedá.
La so promoción na empresa familiar y nos órganos de representación de delles organizaciones empresariales víveles como un procesu natural: “Tradicionalmente el mio sector y el del metal yeren mui masculinos y nun había tantes muyeres empresaries como agora. Pero los tiempos camuden, agora les muyeres van asumiendo responsabilidaes con más naturalidá. Nel Executivu de la CAC somos delles y la presencia de la muyer va normalizándose nestos organismos y ye positivu qu'asina sía”, declaró en convirtiéndose na primer vicepresidenta de FADE. Agora yá nun ye la esceición. Ángela Santianes, presidenta de Du Pont n'España y Portugal, desempeña otra de les cuatro vicepresidencies de la patronal asturiana.
Feito emponderó esti día n'Avilés a Calvo como la persona qu'axunta los meyores atributos pa dirixir nos próximos cuatro años la Federación. Va trés años, n'aportando a la cúpula de la patronal, Calvo destacara la personalidá del inda güei presidente de FADE por tener “les idees bien clares” y espresales “tamién de forma bien nídia”, y valoró que llegara a la dirixencia de la patronal asturiana “con ánimu de xunir y de que tol mundu se sienta representáu”. Calvo espresó entós el so enfotu porque les pequeñes y medianes empreses de la comunidá participaren na cúpula empresarial y se sintieren representaes nella.
