Daniel Fernández Álvarez entrena a los ordenadores pa que sían más “llistos”. Pa que sepan estremar cuándo l'internauta solicita información sobre'l Rei Juan Carlos (la persona) o la Rei Juan Carlos (la universidá). Pa que cuando l'usuariu busque Fernando Alonso n'internet, Google-y respuenda con una imaxe del pilotu uvieín garrando'l so cascu de Fórmula 1... 

Y tou eso llógrase, diz esti mozu inxenieru informáticu, asignando a cada idea unos identificadores concretos y construyendo grafos –una gran rede na que munchos nodos se conceten ente ellos– cada vez más complexos. “L'oxetivu de la mio tesis ye tender pontes ente lo qu'entienden los humanos y les máquines, esto ye, entemecer la web semántica y el llinguaxe natural”, resume Fernández, uvieín de 29 años. 

Nesti campu ta casi tou por facer, como remarquen los sos directores de tesis, los profesores titulares del departamentu d'Informática José Emilio Labra Gayo y Daniel Gayo Avello. “Tamos quiciabes na so infancia. Si compares la web cola hestoria de la humanidá tamos nos entamos. Y más entá si falamos de la web semántica”, aseguren. Pero nesti curtiu espaciu de tiempu produciéronse grandes meyores. Por casu, señala Daniel Gayo, “enantes Google pa contestar ufiertábate miles de páxines; agora, sicasí, date respuestes directes”. Como dicite que LA NUEVA ESPAÑA ye un periódicu al teclealu nel buscador. Y eso que paez maxa ye en realidá'l trabayu de miles d'inxenieros. Ente ellos, l'uvieín Daniel Fernández, que pa la so investigación collaboró de forma bien estrecha con Wikidata, la cadarma de datos de Wikipedia. 

La técnica más senciella pa que les máquines sepan lo que los humanos queremos ye asignar a cada idea un identificador, y asina quitá-y al llinguaxe natural la so ambigüedá. “Cuando crees millones d'identificadores, puedes resolver entrugues percomplexes. Lo que güei conocemos como intelixencia artificial encóntase sobre los datos, en parte sobre'l tipu de datos que producimos nós”, esclaria Daniel Fernández. Nesti puntu, los profesores José Emilio Labra y Daniel Gayo avisen de que les máquines en realidá nun aprienden, “el qu'apriende ye l'inxenieru”. “La máquina nun sabe lo que fai. Sigue siendo igual de tonta”, señalen. Y mesmo qu'un navegador GPS s'enguedeya, Google tamién puede enguedeyase nes respuestes. Asina asocede cuando-y entrugues pola llegada de los humanos a América. “Dependiendo de cómo-y lo preguntes (humanos o persones) o en qué idioma lo faigas, date una fecha distinta”, repostia Gayo. 

El trabayu de Daniel Fernández ye a “perllargu plazu”. Porque son munches les coses que queden por enseñar. “Les máquines tienen que saber estremar qu'esto ye un númberu de teléfonu, qu'aquello ye un DNI, qu'esto otro ye una fecha de nacencia. Y toa esa información que nós damos por fecho, nun ye pa nada trivial y hai que dir enseñándo-yosla a los ordenadores”, comenten los investigadores. En tou ello xueguen un papel fundamental los grafos, que ye lo que, por exemplu, esplota una rede social pa facer encamientos d'alumnos o lo que fai un navegador GPS pa calcular rutes. El retu de munchos inxenieros informáticos de tou'l mundu ye qu'esos grafos s'enllenen automáticamente y que les mesmes máquines detecten fallos y los igüen. Solo Wikidata ta formada anguaño por 93 millones de nodos d'información.

Daniel Fernández esplica na pizarra qué ye un grafo.

Esti usu masivu de datos tien, según los investigadores asturianos, los sos aspeutos positivos (“tola conocencia que xeneres”) pero tamién negativos (“amenorgues la privacidá”). Ellos prefieren quedase, sicasí, colos primeres y ponen como exemplu la so aportación fecha mientres la pandemia pa “ameyorar la conocencia de la humanidá”. “Daniel diseñó una técnica, que se ta utilizando a nivel mundial, y que permite analizar grafos rellacionaos col covid. Esos grafos provienen en parte d'estracción d'información automática de 280.000 publicaciones rellacionaes col virus per parte d'otros inxenieros. Si tienes que poner a un grupu d'investigación a interpretar toa esa información, por descomanada resulta inabarcable. D'ende la importancia de buscar nueves técniques. Y eso fiximos. Ello ye que fuimos convidaos a dar una charra a la Universidá de Stanford y ta bien qu'esto se sepa por que la xente vea que tamién dende la Escuela d'Inxeniería Informática tamos faciendo coses p'ayudar na llucha contra'l coronavirus”, cavilga José Emilio Labra. 

L'uvieín Daniel Fernández ta na recta final de la so tesis, qu'empezó va seis años, y cuenta presentala en 2022. La so gran vocación pola docencia llevólu a matriculase nel programa de doctoráu, que realiza dientro del grupu d'investigación WESO (Web Semántica Oviedo), formáu por diez profesores y constituyíu en 2004. “Lo bono d'Informática ye qu'hai trabayu na empresa y meyor pagáu que na Universidá. La carrera investigadora nesta área resulta poco atractiva, polo que si daquién fai'l doctoráu, como Daniel, suel tener el güeyu puestu en ser profesor”, indica Labra. Esa gran salida llaboral conviértese nun “handicap” a la de formar grupos d'investigación, a lo que s'axunta que nesta rama de la inxeniería los proyectos “son polo xeneral d'un añu namás”. “Ye bien difícil consiguir financiamientu, y la que llega ye fundamentalmente de fora”, rematen Labra y Gayo.