“Espero que sía l'últimu añu en qu'esta fiesta sía una reivindicación y que podamos celebrar yá la oficialidá como tal. Tamos trabayando por que pueda ser posible y una realidá”, dixo esti día'l director xeneral de Política Llingüística del Principáu, Antón García, na ventiava quinta edición de la Fiesta de la Oficialidá de Bimenes, bien amenorgada pola pandemia pero con un espíritu allegre y esperanzador al sentir que la oficialidá de la llingua asturiana ta cada vez más cerca. 

El palaciu del Marqués de Casa Estrada, en Martimporra, acoyó la íntima celebración alredor del asturianu, el festexu de “les 25 folixes de la oficialidá” como la resumió l'Alcalde del conceyu, Aitor García, quien espera tamién qu'esta ventiava quinta edición “seya l'últimu añu que tengamos que reivindicar esti derechu y que podamos festexar la oficialidá dafechu”. El rexidor tuvo acompañáu por representantes políticos de les corporaciones de Nava, Noreña, Siero y Cabranes nun actu nel que nun hubo públicu, malapenes unos vecinos que s'averaron, nin tampoco la tradicional fiesta qu'axunta a cientos de persones cada añu. 

Pero foi una edición feliz, marcada poles ganes y l'enfotu en que la declaración d'oficilidá de la llingua asturiana llegue nun añu. El director xeneral de Política Llingüística cree que l'alderique abiertu na sociedá nos últimos años sobre la recuperación cultural del asturianu “ye positivu” y confía en que, a la fin, “va terminar treslladándose tamién al papel. Esperemos qu'esti compromisu de reforma del estatutu pueda entamase y concluyir con ésitu”, remató. 

La celebración tuvo animada con música y danza tradicional a cargu del grupu “Los Yerbatos”, pero llindóse a les intervenciones. Ente elles, la del alcalde de Miranda de Douru, en Portugal, hermanáu con Bimenes: “Ye un actu bien importante, porque pon en valor la llingua, tenemos una hermandá ente l'asturianu y el mirandés y tar equí representa muncho pa nós”, dixo Artur Nunes

Amás, como ye l'últimu añu nel que Nunes va participar na celebración yerbata na so condición de maximu representante de Miranda de Douru –visto que'l próximu ochobre dexa'l cargu pola llimitación de doce años impuesta nel país lusu–, el rexidor de Bimenes apurrió-y la llave del Consistoriu como xestu d'agradecimientu y alcordanza de la so implicación nel hermanamientu y la reivindicación llingüística de dambos conceyos.