Ana Fernández abre la ventana y dexa qu'entre'l frescu de primera hora. Güel a yerba cortao y a l'agua d'ayeri. Esa va ser la so redolada pa teletrabayar güei. 

Un luxu pa ella, y tamién pal pueblu de L.lamas (Ayer). Dende la crisis del covid-19, esta ayerana asitiada en Xixón vuelve siempre que puede al so pueblu natal. Los sos dos fíos, y otros neños que tán braniando, dan vida a unes cais enantes apagaes. Cuéntense por cientos los que tomaron la decisión de volver –si non definitivamente, siempres que ye posible– a les sos cases de la zona rural de les Cuenques. Piden un “esfuerzu” a les alministraciones y a les compañíes telefóniques p'ameyorar les conexones: ven “inviable” dar vida a los pueblos ensin asegurar los medios pal teletrabayu. Ye una reclamación que lleven meses abanderando hosteleros y empresarios de la zona. 

“Güei funciona de luxu”, diz Ana Fernández, señalando cola cabeza al so móvil. Y especifica “güei”, porque'l valle de Casomera y otros puntos del altu Ayer tuvieron quince díes ensin datos nin cobertoria móvil pa delles compañíes. L'avería afectó, según fontes d'una de les empreses de telefonía, a alredor de mil persones: “Foi una pexiguera”, apunta Ana Fernández, que ye inxeniera industrial y trabaya nuna empresa de Xixón. 

Una pexiguera que-y torgó disfrutar del so pueblu a ella y a los sos fíos. Amás, ta pagando'l máximu na tarifa del so móvil pa poder compartir los datos al traviés de wifi: “Dixéronme que sí podríen compensame por estos díes ensin serviciu, pero nun va ser una compensación real. Tuvi que moveme a Xixón los díes que los neños quedaron con mio madre mentanto yo trabayaba. A ellos nun quixi sacalos del pueblu por un problema míu”, señala. 

Tien bona rede, pero nun trabaya tranquila: “Siempres tas en vilu, pendiente de la cobertoria por si tienes que dir trabayar presencial nel momentu que menos lo esperes”. Ye una quexa que se repite en tola zona rural. Ello ye qu'esti día pela mañana –tres unes precipitaciones débiles– los conceyos de Casu y Sobrescobio rexistraron averíes na rede móvil. “Pidimos a les compañíes telefóniques que pongan de so parte, porque nun ta tou en manes de les alministraciones”, destaquen los afectaos. 

La cobertoria móvil ye clave nestos tiempos de teletrabayu rural. ¿Por qué? Tan fácil como que los datos del móvil, compartíos al traviés de wifi, siguen siendo la única opción d'internet pa munches localidaes de les Cuenques. Allá onde nun llega'l satélite, nin l'ADSL. Nesos requexos nos que la fibra óptica nin se suaña. “Dacuando abusen porque solo llega una compañía”, señala una vecina de Casomera que pasia per L.lamas, y se cruza con Ana Fernández na puerta. 

El “abusu” tien cifra: más de cien euros de factura pa internet básicu y trés teléfonos móviles con datos llindaos. Porque, como asocede en dellos puntos del valle de Casomera, los vecinos vense obligaos a contratar la telefonía fixa ya internet con una compañía; y la rede móvil con otra, pola falta de cobertoria. 

“Esto tienen que lo ameyorar. Pero si les compañíes nun ponen de so parte... ye difícil. Tien que ser un alcuerdu ente compañíes y alministraciones”, consideren los vecinos. L'Alministración rexonal anunció a principios d'esti añu'l Plan d'Estensión de la Banda Ancha (PEBA) de nueva xeneración. Cuenta con una inversión de 12,5 millones d'euros y va permitir dar cobertoria a más de 42.800 viviendes y empreses. Nes Cuenques, según el llistáu oficial, la fibra óptica va llegar a 303 localidaes. Cuenten facer trabayos nos conceyos d'Ayer, Llangréu, Llaviana, Mieres, Morcín y Samartín del Rei Aurelio. El conceyu más favorecíu pol plan va ser San Martín (con 106 localidaes beneficiaes), siguíu per Llangréu (62) y Llaviana (62). 

Una bona noticia a medies. Porque, anguaño, entá tán pendientes actuaciones d'anteriores exercicios nel conceyu de Casu. En Sobrescobio, los llabores pa la llegada de la fibra óptica yá tán concluyendo. Nes Cuenques, nel añu 2020, había 30.000 vecinos viviendo en “zones blanques”. Asina denomina'l Gobiernu central aquellos sitios que nun disponen de cobertoria de redes de banda ancha de nueva xeneración, nin previsiones pa la so dotación nel plazu de trés años.