“Volvía de la fábrica, y el negativu que llevaba en bolsu pesába-y un mundu enteru. Sabía qu'eses semeyes, dalgún día, diben facer hestoria”.
Hai persones que nacen p'aguantar. Como David Moyano Tejerina (Uxo, 1922-Bruxeles, 2011), mierense que foi prisioneru del campu de concentración de Mauthausen. Formó parte del “Kommando Poschacher”, una brigada clave na llucha contra'l nazismu. Él y los sos compañeros ayudaron a Francisco Boix –el “fotógrafu de Mauthausen”– a esconder los negativos qu'amosaben l'horror del campu. Eses imaxes fueron clave nos xuicios de Nuremberg. Esti ye'l relatu de cómo un oscense, cola ayuda casi nunca recordada d'una moza alemana antifascista, fixo hestoria.
"Teníemos qu'acarretar piedres pelos 186 pasos que llevaben a la cantera y munchos tiráronse al vaciu. Yo pensé delles vegaes en matame, pero a la fin nun tuvi fuerza abondo”
L'historiador mierense Carlos Barrio busca, nuna carpeta de plásticu abultada, la biografía de Moyano. Forma parte del grupu d'investigación de Deportaos Asturies, qu'encabezó pa esti casu en concretu Begoña Álvarez Cienfuegos.
Un resume: con 15 años namás, apuntóse al exércitu. Pasó per dellos frentes, hasta ser destináu a Figueres. Ellí formó parte de la batería antiaérea 118 del Campu de la Bota. “Escapando de la ocupación franquista de Cataluña, pasó a Francia. Internáronlu nel campu de concentración de Argelès-sur-Mer”, esplica l'historiador. Cayó prisioneru de les tropes nazis en 1940. El 27 de xineru de 1941, deportáronlu xunto a otros mil quinientos españoles al campu de Mauthausen.
“Sintió l'asperez del piyama, yera la primer vegada que lu vistía. El so númberu de prisioneru yera redondu: 6060. Llevaba bordáu un triángulu azul invertíu, el qu'asignaben a los apátrides. Asina los describía Franco: homes ensin tierra. Pero él sabía que sí tenía una casa, un llar, que dexara n'Uxo. Supo que Mauthausen diba quitá-y la fuerza, la mocedá y la risa. La so misión, dientro d'esi piyama ríxidu, diba ser caltener la dignidá”.
Yera mozu y taba sanu. Por eso, esplica Carlos Barrio, a Moyano “destináronlu a trabayar na cantera de Mauthausen”. Foi una esperiencia “terrible”, qu'el mesmu David Moyano Tejerina –n'información recoyida en delles publicaciones d'historiadores– recordaba asina: “Trabayábemos a 20 graos baxo cero, vistíos namás con un piyama. Yera escangayante. Teníemos qu'acarretar piedres pelos 186 pasos que llevaben a la cantera y munchos tiráronse al vaciu. Yo pensé delles vegaes en matame, pero a la fin nun tuvi fuerza abondo”.
Aguantó, y la so vida ameyoró un poco: escoyéronlu pa formar parte del “Kommando Poschacher”. Yeren toos españoles y mozos. El comandu debía'l so nome a la factoría na que trabayaben. “A esti altor del holocaustu, los nazis yá mataren a tantes persones que casi nun teníen mano d'obra. L'esterminiu frenárase”, matiza Barrio. Dende ochobre de 1944, los miembros del “Kommando Poschacher” “disfrutaron” d'un réxime de semillibertad. Salíen a trabayar, dormíen nel campu.
Francisco Boix, el conocíu “fotógrafu de Mauthausen”, pidió-yos ayuda pa esconder unos negativos. Yeren imaxes de cuerpos apilados, esperimentos doliosos, prisioneros sangrándose. El plan de Boix, una historia que llevó Mar Targarona al cine, yera “salvar” 20.000 fotografíes como preba del Holocaustu.
“Acelerábase-y l'aliendu cada vez que raspiaba la mano col negativu. Facíalo tantes vegaes al día… necesitaba saber que siguía en bolsu. Esa tarde vería a Anna, un pasu escontra la verdá”.
La película “El fotógrafu de Mauthausen”, que protagonizó Mario Casas, resalva un personaxe clave de la hestoria. David Moyano Tejerina nunca lo escaeció: trátase d'Anna Pointner, una moza alemana del pueblu de Mauthausen. Quería ayudar a los prisioneros pa que cayera el nazismu. Detrás de la piedra suelta d'un muriu, escondió los negativos que-y apurríen los españoles del “Kommando Poschacher”.
Aguantaron. Tres la lliberación del campu y la cayida del nazismu, eses semeyes reveláronse: “Fueron una pieza clave nos xuicios contra los mandos nazis que se celebraron en Nuremberg y en Dachau”, esplica Carlos Barrio. Boix pasó a la hestoria, anque morrió solo seis años depués de la lliberación de Mauthausen. El mierense David Moyano Tejerina finó en Bruxeles, nel añu 2011. Enxamás dexó d'aguantar.
“Abrió'l periódicu coles sos manes, que yá tremecíen de 87 años de llucha. Pasó les páxines rápido, y lleó titular y sumariu: ‘L'Audiencia Nacional ordena la captura de trés nazis tres la denuncia d'un asturianu’. ‘David Moyano, de 87 años, ye ún de los supervivientes del Holocaustu y llevó ante los tribunales por tortura a trés vixilantes de campu de les SS’. (LA NUEVA ESPAÑA, 19 de setiembre de 2009)”.
