Los arqueólogos van volver, d'equí a un mes, a San Martín de La Estaca, en Les Regueres. L'equipu que dirixe Juan Muñiz va entamar una nueva campaña d'escavaciones nel xacimientu p'hacia'l 16 d'agostu, coles mires de dir afondando na conocencia de la espectacular villa romana que los investigadores empezaron a desaterrar en 2018. Unos trabayos pa los que los arqueólogos cuenten con una ayuda de 5.000 euros, otorgada pol Principáu d'Asturies, pero pa la que-yos faen falta otros 10.000. P'algamar el presupuestu necesariu, qu'avaló l'equipu que dirixe les investigaciones, entamóse una campaña de mecenalgu al traviés de la páxina de pagos PayPal. 

Mientres esta nueva campaña, que va durar daqué más d'un mes, los arqueólogos van centrase nuna sala del edificiu principal na que s'atoparon restos de pintures, y n'otru edificiu exentu, d'un tamañu importante, y nel qu'albidren atopar nicios claros de cuála yera la naturaleza d'esta villa romana. 

Desque en 2018 s'entamaron les escavaciones, mesmo los arqueólogos como l'Asociación d'Amigos de la villa romana de San Martín de La Estaca afalaron delles acciones de captación de fondos, pa siguir desentrañando'l pasáu romanu de la zona. N'otros años impulsáronse diverses actividaes y hasta se llanzó una campaña de crowdfunding, pero esta vegada ye más directo. “Lo que facemos agora ye una campaña de mecenalgu dafechu, dirixida a toos los que quieran ayudar a la continuidá d'estes escavaciones”, esplica Juan Muñiz. Al respective de la decisión del equipu d'arqueólogos de responder pola nueva campaña, Muñiz señala que “nestes escavaciones, polo xeneral, acabemos poniendo dineru”. Con too y con ello, l'arqueólogu confía en que se caltenga'l respaldu ciudadanu a esta investigación, y llograr esos 10.000 euros necesarios pa completar la campaña d'esti añu, anque ye consciente de que lo más probable ye que nun se llogre esi oxetivu hasta los últimos díes de la mesma campaña, yá en plenu mes de setiembre. Les donaciones pueden concretase na web https://paypal.me/donatemosaico. 

Los arqueólogos tienen claro, sía que non, que van siguir trabayando nel xacimientu de La Estaca, onde yá recuperaron dos magníficos mosaicos.