La temporada de pesca tradicional (con muerte) del salmón echó'l zarru esta selmana tres un cursu nel que, polo xeneral, les captures amenorgaron. La principal esplicación que dan les sociedaes de pescadores a esta baxada ye la prohibición del usu d'una popular técnica de pesca, conocida como ninfa, dende'l 15 de xunu al zarru de la campaña. Nesi periodu namás se puedieron pescar salmones a mosca. Otra de les razones que dan estes sociedaes ye la presencia cada vez más abondosa d'especies depredadores como llóndrigues y mabees. Eso sí, el descensu de captures tuvo una esceición nel ríu Eo, la cuenca más occidental d'Asturies, onde se dobló'l númberu d'exemplares echaos a tierra: de 25 a 50.
El balance na cuenca Narcea-Nalón foi peor abondo, visto que l'últimu día la campaña diba por 300 captures y en 2020 acabó con 457 salmones. Enrique Berrocal, presidente de la sociedá de pescadores Las Mestas del Narcea, con sede en Pravia, esperaba esti descensu: “Ye lo razonable, lo normal yera qu'esti añu hubiera munches menos captures; yo cuntaba que diben ser unos 200 menos por nun poder pescar a ninfa”.
Según Berrocal, valorar la cantidá de pexes qu'hai en ríu en función de les gráfiques de captures ye un erru: “Y menos faciendo comparanza d'años nos que ta permitida la ninfa colos que non”. Con tou, sí que reconoz que foi una temporada “mala” pa la mayoría de cuenques, anque considera que'l descensu tien la so parte positiva, “yá que salen menos salmones del ríu”, señala.
La situación nel ríu Eo foi distinta y entós les conclusiones a les que lleguen ellí tamién camuden. “El balance ye positivu porque nos últimos años salíen mui pocos salmones y esti añu viéronse munchos y pescáronse más, creo que se ta empezando a recuperar un poco, anque entá ye llueu pa dicilo; tamos esperanzaos pero va haber qu'esperar dos o trés años pa comprobalo”, diz Pepe Pérez, “Barbes”, gancheiro del ríu que llenda cola provincia de Lugo. Cerca, nel ríu Esva, la temporada salmonera –que sigue hasta'l 31 de xunetu cola modalidá ensin muerte– foi un estropiciu. Igual qu'en 2020, la cuenca del Occidente dexa un saldu d'un salmón precintáu: “Hai salmones pero nun salieron”, asegura Emilio Fernández Corral, presidente de la sociedá de pescadores “La Socala”, con base nel conceyu de Valdés. Fernández Corral esplica que “hasta apocayá nun llovió lo bastante, había poco agua” y por eso los salmones “quedaren na zona baxa”. “Al llover empezaron a xubir escontra'l pozu Benito porque tien una fondura na qu'afayen bien y si hai un repique d'agua, cólense escontra riba”, añede.
Los ánimos nes cuenques del Oriente son entá peores que nes del restu de la rexón. El númberu de captures amenorgó de forma considerable: el Sella diba l'últimu día por 125 captures, cuando en 2020 la temporada acabó con 225 salmones echaos a tierra; el Cares, pela so parte, llevaba 49 y en 2020 acabó con 155 exemplares. El riberanu Javier Gutiérrez Cuadriello, de la saga de Los Barqueros, llamentaba la presencia de “mabees, llondres, garces...”, que, na so opinión, “tán acabando con tou, truches y reos cada añu hai menos y esti añu ye alarmante lo pocu qu'hai”.
Otra de les quexes de los riberanos ye l'estáu de los pozos: “Tán cada vez peor, tendríen que nos dexar igualos, pos somos munchos y hai poco onde pescar; a tou ello hai que sumar que lo de la normativa d'esti añu, que ta permal, quitonos un mes de poder pescar porque lo de la mosca ta bien llindáu pa un ríu como'l Seya”, añedía Gutiérrez Cuadriello, que, pela so parte, sacó trés exemplares esti cursu.
Dende la sociedá de pesca El Esmerillón, Eduardo López Álvarez esplica que “la temporada foi regular, como se prevía, marcada por una veda atapada a partir del 15 de xunu”. Según los sos cálculos, nel Seya quitáron-yos un “mes de pesca y un centenar de captures”. López Álvarez ye percríticu cola nueva norma: “Lluciéronse cola normativa, lo que consiguieron foi atropar a la xente nel Nalón y el Narcea. Lo de la rectificación final de la pesca a mosca en superficie supera tou lo anterior”, añedía. El cangués José Luis Somoano Sánchez, más conocíu como “Paxa”, ún de los meyores pescadores de salmón d'Asturies, propón que “acuten tol ríu”. “Cotos más pequenos y más baratos, por exemplu, el cotu de La Ponte Romana, nel Seya, puede estremase en dos cotos”, señala. Somoano coincide col analís negativu: “La temporada foi mala, con mui pocos salmones, nun entraron los añales (salmones de pequeñu tamañu), nun vi nengún”. A lo último, na cuenca más oriental, nel Cares, los ánimos tamién taben pelos suelos: “Espeñamos en captures y hai poco pel ríu. Esperábase un meyor añu”, llamentaba un espertu riberanu de la zona.
