Hai un Airbus qu'aterriza dellos miércoles n'Asturies y que lleva nome de muyer: María Bernaldo de Quirós. Nun ye un nome más, ye'l d'una pionera con raigaños asturianos. Esa rotulación ye un xestu singular de la compañía Iberia, que va unos meses quixo reconocer d'esta forma, marcando'l so nome nel morru d'ún de los sos aviones más modernos, la figura de quien abrió camín y foi conocida como “Miss Golondrina” pola so habilidá pa facer acrobacies.
María Bernaldo de Quirós foi la muyer que sacó la primer llicencia de pilotu n'España (en 1928) y, magar la oposición qu'atopó a les sos moliciones, realizó centenares de bautismos aéreos –munchos d'ellos a muyeres– a bordu del so De Havilland DH60. Tamién se convirtió n'instructora de vuelu.
“Ye l'homenaxe a una muyer moderna que quería volar coles sos propies ales y qu'afirmaba que les muyeres pueden facer daqué más que bordar”; una fémina “valiente y rompedora, una auténtica adelantada al so tiempu” –tamién foi de les primeres en recurrir a la llei del Divorciu–, dicen dende Iberia como xustificación al xestu qu'adoptaron a finales del pasáu añu nomando a ún de los sos 22 Airbus A320neo col nome completu de “Miss Golondrina”.
Meses depués, al avión diéron-y ruta estable, una que punxo a Bernaldo de Quirós de nuevu camín d'Asturies, porque ye ún de los modelos que cubren el viaxe Madrid-Asturies y que llega, en concretu, los miércoles a primer hora. Ye “el más avanzáu tecnolóxicamente y eficiente de la flota d'Iberia de curtiu y mediu radio”.
María Salud Bernaldo de Quirós y Bustillo (1898-1983) nació en Madrid pero los sos raigaños familiares fúndense nel oriente asturianu, concretamente en Llanes. Llamábenla “Eca” y yera fía de los aristócrates Rafael Bernaldo de Quirós y Mier y Consolación Bustillo y Mendoza, marquesa de los Altares. Entamó la so carrera cuando s'apuntó a los cursos de pilotu na Escuela Civil de Getafe, siendo la única muyer del grupu d'aspirantes. Va solo unos años una esposición en Llanes alredor de les hestories de l'aviación nel conceyu, impulsada por Higinio del Río, yá afayó a munchos interesaos la figura d'esta fía de Llanes y el pasáu añu tamién trató sobre la so figura una conferencia impartida en Posada de Llanera pol historiador Alfredo Rodríguez Iglesias.
Asturies foi testigu de les habilidaes de María Bernaldo de Quirós yá qu'aterrizó en Llamorgal (Llanera) en 1929, creando una gran espectación. Ellí realiza bautismos aéreos a los llanerenses, cuantimás a les muyeres. Tamién daquella sobrevoló Uviéu, con aterrizaxe incluyíu na plaza de toros, y pasó perriba del campusantu, onde tiró un ramu de flores n'homenaxe al pilotu fináu José Cañedo. Gasayósela, a ella y a los pilotos colos que viaxó a Asturies –ente ellos la figura de l'aviación y depués ministru del Aire, Díaz de Lecea, col que tuvo una relación la llanisca– con una llacuada en Llanera.
Los últimos años de “Miss Golondrina” trescurrieron ente Madrid y Asturies. Volvió ser propietaria del Palaciu de los Altares y ayudó a recuperar la romería de Nuestra Señora de la Salú, en Pancar. Agora vuelve sobrevolar Asturies.
