L'osu pardu ye una de les especies más emblemátiques del cordal Cantábricu, cuantimás d'Asturies. Estos animales corrieron riesgu d'estinción nes décades pasaes, pero "gracies a les actuaciones de les alministraciones, de numberoses entidaes y organizaciones cíviques, xuníu al compromisu de los vecinos de les comarques implicaes, consiguióse que güei'l futuru sía esperanzador, magar que'l peligru citáu sigue presente", esplica Nicanor Fernández, presidente de la Fundación Oso d'Asturies (FOA).
Con esi contestu favorable, pero entá de riesgu, la Fundación Oso d'Asturies, la Cámara de Comerciu d'Uviéu, Hostelería y Turismu d'Asturies (Otea) y la Fundación Oso Pardo presentaron una guía didáctica y el decálogu empobinaos a los visitantes y turistes, que xira alredor de cómo practicar un 'Turismu responsable en territorios oseros'. Y más agora, que trescendieron delles presencies d'osos en zones poblaes hasta con dalgún ataque a vecinos de la zona. Daqué, según los espertos, bien raro.
Porque lo que ta asocediendo n'Asturies colos osos ye, según Nicanor Fernández, "un ésitu nel qu'hai que siguir afondando". Y eso implica enfocar polítiques d'información al respective de cómo'l turismu tien de rellacionase cola fauna asturiana, col porgüeyu de "evitar alcuentros casuales y saber como actuar nel casu de qu'estos se produzan".
"Ye un arguyu pa toos. Ta dándose la importancia que tien a una especie que nos marchaba de les manes", comentó Guillermo Palomero, de la Fundación Oso Pardo, que fala d'una población total de 350 osos nel territoriu, y que tán "en constante aumentu añu a añu".
Dende les trés asociaciones treslladaron la so fonda esmolición por "evitar comportamientos imprudentes", visto l'aumentu d'ociu nos montes asturianos. "Nun queremos turistes mochileros que nun respeten la fauna. Faen falta turistes que respeten l'ecosistema y que sepan portase", reclama José Luis Almeida, presidente d'Otea, qu'anuncia futures actividaes pa la educación de los viaxeros: "vamos informar y educar a los turistes, especialmente a los neños, pa empobinar p'hacia un turismu respetuosu y calidable".
Conseyos a siguir en zones oseres
- Informase sobre cómo tán regulaos los usos, respetar la señalización y caminar peles zones autorizaes. Ye illegal, amás de peligroso, averase a la fauna selvaxe pa la so observación y fotografía.
- Los paseos tienen de realizase de día y nunca solos, utilizando los caminos principales, faciéndose notar y ensin entrar nunca en senderos marcaos pola fauna. En casu de detectar güelgues d'osu nun hai que les siguir.
- Tienen de respetase les camperes, zarros de finques, el ganáu, los perros de trabayu..., y, poques gracies, a toles persones que viven nel territoriu, según los sos llabores.
- Nunca hai que dexar restos de comida nin basures en monte, una y bones que los osos y otros animales pueden aprender a rellacionar la presencia humana con zones d'alimentación, lo que puede suponer un riesgu pa la fauna y pa les persones.
- Si pasiamos con perros, fae falta llevalos ataos y nos espacios protexíos, ye obligatorio, yá qu'amás de poder fadiar a la fauna montesa o doméstica, si atopamos con dalgún animal, pueden buscar abellugu al pie de los sos dueños, y van atraelos escontra ellos.
Qué facer si atopes un osu cerca:
- Cuando l'animal nun detectó a les persones, lo meyor ye retirase con tranquilidá, ensin correr, nin ruios o voces que puedan sollertalu.
- Si ye l'osu'l que detecta a les persones, hai que facese notar ensin perdelu de vista, falando altu y con seguridá, ensin berros y esparavanes, nin dirixise escontra él. Si-y facilitámos víes d'escape, va fuxir.
- Cuando se trata d'una osa con críes, hai que dexar espaciu pa que les axunte y fuxa. Nunca hai qu'intentar averase.
- Si observamos un esbardu a curtia distancia, nunca se debe intentar atrapar. Ye posible que la madre nun tea llueñe y s'allegue a defendelu.
- Cuando un osu llevanta sobre les pates traseres, faelo pa detectar meyor a les persones, en nengún casu tien de considerase una amenaza.
- Si un osu ta comiendo, hai qu'alloñar, yá que puede reaccionar de forma agresiva pa defender la so comida.
- Cuando los osos caminen per una carretera o una pista transitable, hai qu'amenorgar la velocidá, o inclusive aparar y encender les lluces d'emerxencia pa que l'animal entre con tranquilidá en monte.
- En bien rares ocasiones un osu puede dirixise a nós, dacuando asemeyando a la carrera un "ataque" primero de dar la vuelta. Si por dalguna razón llega al nuesu altor, tenemos de chanos en posición fetal, protexendo la nuca y la cabeza.
