“La peor parte del trabayu llévenla los buzos, anque nun ye fácil la de naide”, esplica José Manuel Artime, trabayador nel sector de la recoyida d'algues dende va más de trenta años. A bordu de los barcos que se dediquen a esta actividá van un patrón, un marineru y trés buzos profesionales, que son los encargaos de cortar les algues dexando un cachu d'unos trés o cuatro centímetros, lo que garantiza que puedan crecer otra vuelta ensin problemes. 

Esta forma de recoyida llámase "arranque" y solo se puede facer nos meses de xunetu a setiembre, con unos cupos establecíos pola alministración pesquera del Principáu d'Asturies. Una vegada cortaes, les algues –del xéneru gelidium– métense nunes redes especiales y la grúa del barcu álales a cubierta. “El barcu sal del puertu a les siete y media de la mañana y trabaya cinco hores, anque sumando'l tiempu que dura la navegación, allega a les seis o siete hores na mar”, sigui esplicando Artime.

33

Recoyida d'ocle en Gozón. Ricardo Solís

El barcu “Endeño 2” cargó esti día una cantidá d'alga gelidium aproximao a los 4.000 kilos –pesu en moyao–, una cifra que se va ver rebaxada cuando se treslladen les algues a los campos d'ensugáu. Una vegada se llogra una cantidá importante de productu secu, cárgase en camiones pa la so distribución a les industries que lo soliciten. 

Y ye qu'esti tipu concretu d'algues, n'Asturies conocida popularmente como ocle, tien demanda en sectores de lo más desemeyao: microbioloxía (como mediu de cultivu), medicina (pa terapies xenétiques), farmacoloxía (fabricación d'insulina o purificación de vacunes), alimentación (espesante y xelificante) y cosmética

Cuando l'ocle se recueye por aciude la técnica d'arribazón, métodu que consiste en recoyer de la vera de la sablera les algues arrastraes poles marees, nun esisten cupos de recueya pero al entemecese con otres especies mengua la so pureza y, nesti casu, empléguense fundamentalmente pa usos gastronómicos.

Mario Benites ayuda al buzu. Ricardo Solís

José Manuel Artime apunta que nos últimos años dalgunos grupos ecoloxistes tán asitiándose en contra del arranque d'algues, col argumentu de que l'usu d'esa técnica nun asegura la so rexeneración. “Yo, que tamién trabayé como buzu mientres munchos años, percorrí tola mariña asturiana y nes zones onde arrincamos algues volvieron crecer; sigue habiendo les mesmes, asegura. 

Amás, la técnica d'arranque ta regulada y controlada pola Conseyería de Mediu Rural, que nesta campaña autorizó a 28 barcos namás pa la estracción d'algues, amás d'afitar les feches y los cupos máximos que pueden estrayese. “Pel branu salimos a faenar de llunes a vienres pa recoyer ocle, siempres que les condiciones de la mar lo dexen. Cuando acaba la temporada y lleguen les marees fuertes, a partir d'ochobre, usamos la técnica d'arribazón”, comenta Artime.

Mario Benites emburria una bola d'algues pela cubierta del barcu “Endeño 2”. R. Solís

“Non siempres se descarga lo recoyío nel mesmu puertu, llévase al que tea más cercanu a la parte de recoyida. Y siempre avisamos el día enantes de la nuesa intención de descargar”, detalla sobre la finalización de la xornada. Al atracar, van tar esperando en puertu tractores con remolques pa llevar l'ocle a los campos d'ensugáu. 

L'añu pasáu, na zona que toma dende cabu Peñes hasta la ría de Villaviciosa consiguiéronse dos millones de tonelaes y cuéntase qu'esti añu pueden algamase cifres asemeyaes. Estudios cartográficos realizaos poles instituciones pertinentes aseguren que les praderíes de gelidium recuperen la so frondosidad d'un añu pa otru, fechu qu'asegura tamién que la tripulación del “Endeño 2” pueda siguir faenando.