Los turistes qu'estos díes s'averen a la capital castropolense van atopase, xunto al conocíu como caide la Punta, con un chisgu a la hestoria local y la tradición marinera de la villa de Castropol. Dos vecinos, col sofitu del Consistoriu, recrearon un antiguu tendeyón de madera onde s'abellugaba antaño un salvavides, necesariu en casu de rexistrase cualquier incidente marítimu nesta villa bañada pola ría del Eo.
“Los que tenemos cierta edá alcordámonos d'esti requexu y recupérase pa recordar la tradición marinera que tuvo Castropol”, cavilga José María Llenderrozos, que promovió la iniciativa con ayuda del tamién castropolense José María Acebo. Cunta'l primeru que sol popular “escaleirón”, una escalera que xune'l cai col cascu urbanu, allugába va décades el conocíu como “banco dos mariñeiros”. Ellí buscaben resguardu de l'airada los vecinos que se dedicaben a tresportar pasaxeros ente Castropol y Ribadeo. Y xusto enriba d'esti bancu taba'l salvavides cola mesma lleenda qu'agora se pintó d'alcordanza: “Respétame, puedo salvarte la vida”.
Llenderrozos y Acebo punxéron manes a la obra y construyeron dende cero la estructura de madera. Ficíeronla con un tableru fenólicu, perfectu por ser un material qu'aguanta bien albentestate, que foi donáu pol astilleru castropolense Gondán. La guinda del pastel púnxola'l salvavides. Punxéronse a buscar ún con cierta hestoria y Federico Fernández Ferrería, más conocíu por “Fico” y por ser un gran conocedor de la ría del Eo, cedió-yos ún que guardara munchos años y que pertenecía al últimu volanteru local.
El barcu “Fernandón”, propiedá d'una de les families con más tradición pesquera de la localidá, foi esguazáu en 1998, pero Fico guardó d'alcordanza dos de los sos salvavides. Llenderrozos y Acebo encargáronse de restaurar ún y da-y l'apariencia que teníen antaño los salvavides cola so característica pintura blanca y colorada. Nun-y falta detalle, yá que tamién asitiaron alredor un cabu al que fixeron dellos nuedos marineros.
La estructura complétase con una placa esplicativa na que se detalla que'l salvavides ye un “oxetu históricu, que nun cumple cola normativa en vigor” y tamién s'esplica la so hestoria a vecinos y visitantes. Recuérdase amás que nel cai de la Punta, na primer metá del sieglu pasáu, embarcábase madera de pinu en pequenos vapores de cabotaxe que fondiaben na canal. Una vida marítima que yá ye pasáu en Castropol, onde solo hai anguaño embarcaciones de recréu.
El salvavides recuperáu axúntase a otros dos elementos de la hestoria local rescataos por estos dos vecinos. El primeru foi un barómetru de mercurio propiedá del Gremio de Mareantes local, que data del sieglu XIX. Recuperáronlu en 2017 y agora puede vese nun inmueble xunto al Consistoriu.
L'otru elementu ye una pieza de madera que s'utilizaba pa tallar a los quintos citaos pal serviciu militar obligatoriu y qu'anguaño s'espón nún de los pasiellos del Ayuntamientu. El gobiernu local estima'l llabor desinteresáu de dambos vecinos por que la hestoria nun s'escaeza.
