A los osos asturianos salió-yos competencia: les caparines. Si columbrar plantígrados ta de moda na rexón pol tirón que tienen les escursiones pa llograr velos na so redolada natural, a la vista del aumentu de la población osera, quién diz que nun asoceda lo mesmo con insectos tan delicaos y vistosos como les caparines. Porque potencial, Asturies, tienlu.

La rexón acueye'l 60 per cientu del total de les caparines de la península ibérica y Baleares. Y el parque natural de Somiedu ye'l so templu. Asina que yá hai quien ta aprovechando esa circunstancia pa ufiertar escursiones empobinaes.

Javier Pedrosa ye ún de los grandes espertos na materia de la rexón y, por aciu de la empresa Geoface, entama salíes comentaes a ún de los hábitats ideales pa estes especies, en Somiedu. "Les meyores xornaes pa fotografiales son los díes soleyeros y calidos. Y n'escecial aquellos nos que nun hai vientu", avisa l'especialista.

Caparina Aglais Urticae nel Parque Natural de Somiedu..

Caparina Aglais Urticae nel Parque Natural de Somiedu.. Geoface

Les caparines caracterícense polos sos dos pares de nales membranoses, cubiertes por escames, y pol so procesu de metamorfosis (güevu, guxanu, crisalida y imago) amás de por ser bioindicadores, esto ye, organismos que nos indiquen cómo ta camudando l'hábitat. Son especies con poblaciones distribuyíes de forma mui variada, una y bones dalgunes son bien comunes y otres son muncho más escases. Esta diversidá fai qu'haya delles especies que vuelen a lo llargo de tou'l territoriu asturianu, mentanto que les más difíciles de columbrar, solo lo faen baxo unes condiciones concretes.

Les caparines, tal como esplica Pedrosa, pueden ser tanto diurnes como nocherniegues, pero la meyor dómina del añu pa la so observación ye la temporada braniza, ente principios de xunu y finales d'agostu. Asina que los turistes de branu tán en bona dómina.

Ún de los habitáculos que s'usen pa la observación.

La razón de que'l Parque Natural de Somiedu sía'l templu de les caparines n'Asturies ye porque presenta una topografía abrupta y marcada polos sos desniveles. Arriendes d'ello, les condiciones climátiques camuden en distancies bien amenorgaes, teniendo tanto temperatures medies, como precipitaciones o distintes duraciones de la cubierta de nieve. Amás, ellí conviven distintes formaciones vexetales, en función de los usos del suelu que se fixeron, anque la mayoría de caparines atópense en montes zarraos, gorbizales, enebrales y praos, cuenta de forma bien didáctica l'espertu.

Caparina Erebia Triaria sobre una flor nel Parque Natural de Somiedu. Geoface

En Somiedu, tán presentes tanto los suelos básicos como los ácidos, acoyendo asina a distintes caparines con requerimientos específicos. Según Javier Pedrosa, "les especies más buscaes nes escursiones son Carcharodus flocciferus, Parnasius apollo, Iphiclides podalirius y Papilio machaon".

Les visites empobinaes qu'entama Geoface, combinen la observación de caparines col senderismu, siguiendo un percorríu qu'empieza pela mañana en media montaña, nuna redolada fecha a les necesidaes del home (colos sos güertos y praos abarganaos). La visita sigue xubiendo escontra paisaxes distintos, yá allugaos n'alta montaña y con menor influencia de l'acción humana. Ellí, nes praderíes alpines y alredor de les 12 del mediudía, arrinca'l gruesu de la esperiencia coles caparines. Por aciu de la fotografía y los cazacaparines, les especies son identificaes y observaes con tiempu, enantes de lliberales y devolveles al so hábitat.

Pa Pedrosa, amás d'identificar les caparines y inmortalizar guapes estampes, “el principal oxetivu de les escursiones ye sensibilizar a los participantes sobre la gran importancia que los insectos tienen nos ecosistemes”, más entá cuando Asturies ye líder n'allugar unes llamatives especies que, definitivamente, son muncho más accesibles de lo qu'abulten.