La campaña d'intervención arqueolóxica realizada l'añu pasáu na torca de La Cerrosa-Lagaña, nel pueblu de Suarías (Peñamellera Baxa), desatapó toa una riestra d'afayos de gran importancia pa los investigadores nesta área. Susana de Luis Mariño, conservadora del Muséu Arqueolóxicu Nacional y directora de la escavación xunto al doctor n'Arqueoloxía Alfonso Fanjul, destaca a LA NUEVA ESPAÑA que los restos humanos descubiertos, dataos de la Edá del Fierro, dieron lluz sobre qué se facía colos muertos nesti periodu del qu'hasta agora nun se teníen necrópolis nesta zona. 

“Dos cranios de muyer pertenecen al sieglu VII-V a. C., y depués hai un güesu llargu d'un home adultu col que damos un reblagu hasta la Segunda Edá del Fierro, ente'l sieglu II a. C. y el cambéu d'era, dómina na que se producieron les Guerres Cántabres”, esplica l'arqueóloga. Esti güesu llargu relacionóse cola figura d'un guerreru que participó nesti conflictu, yá que al pie d'él apaeció una panoplia guerrera, que De Luis califica como un conxuntu “mui completu”. “La fabricación ye de la zona, pero nun se puede determinar si pertenez a un romanu o a un indíxena, visto que les armes adquiríense toes nesti terrén”. Tamién incide en que los restos sían de sieglos distintos, una y bones “la elección de depositar el cuerpu del guerreru nesta cueva paez condicionada pol fechu de qu'hubiera restos humanos previos”

Ente los elementos de la panoplia, l'arqueóloga destaca l'afayu de cuatro llances y la vaina d'un puñal, de bronce por dambes cares, según restos de la petrina. Non solo hai elementos guerreros, si non tamién otros d'adornu, como por casu una fíbula de tipu omega, d'una factura artesanal impecable. Destaca tamién una navaya d'afaitar, que puede dexar conocer más sobre'l cuidu masculín y la estética del momentu. 

Amás, na cueva había una gran cantidá de fauna. Estos restos de vaques, cabres y caballos relaciónense con sacrificios d'animales nes llacuaes funeraries, yá que na cueva tamién aprució un cuchiellu que sirviría pa cortar carne. 

Toos estes “ayalgues arqueolóxiques” sometiéronse a prebes de Carbonu 14 y tase inda a la espera de les resultancies de pruebes d'ADN y d'isótopos. “Tou esto lleva tiempu y siguimos trabayando nello, amás de tar pendientes de materiales asemeyaos qu'apaezan n'otres cueves y en futures campañes coles que llogremos más información”, esplica Susana de Luis, qu'agradez a la Conseyería de Cultura que nesti últimu añu-yos facilitáren la investigación, que permitió establecer la torca de La Cerrosa-Lagaña como ún de los territorios soterraños más ricos n'amueses de la Edá de Fierro y l'empiezu de la romanización.