Trés estudiantes del títulu propiu "Asturias, espacio, patrimonio, historia, cultura", qu'imparte la Universidá d'Uviéu, denuncien ser discriminaos en presentando un trabayu n'asturianu. Según espliquen dende'l colectivu "Iniciativa pol Asturianu", l'asignatura en cuestión consistía nun trabayu y nun exame tipu test. El problema llegó col trabayu, qu'estos trés alumnos presentaron n'asturianu, y que foi calificáu como "non presentáu". Eso costó-yos el suspensu en primer convocatoria.
La intervención del director del títulu, qu'ufiertó correxir los trabayos, aseguren dende Iniciativa pol Asturianu, sirvió por que finalmente-yos aprobáren l'asignatura en segunda convocatoria. Ún de los alumnos d'esti títulu propiu de la Universidá d'Uviéu que foi suspendíu en primer convocatoria, Inaciu Galán, al tiempu vocal d'Iniciativa pol Asturianu, esplica que nengún d'ellos tuvo problemes con nenguna de les otres 22 asignatures del máster, nes que tamién presentaron trabayos n'asturianu, y denuncia "inseguridá xurídica por espresase n'asturianu".
Esta nun ye la primer vegada qu'asocede daqué asemeyao na Universidá d'Uviéu y el mesmu Inaciu Galán tuvo un problema similar en xineru de 2020, cuando lu obligaron a traducir una tesis al castellán pa poder presentala.
