Una pareya de madrilanos llama a una inmobiliaria asturiana. Pregunten por parceles en vienta en cualquier pueblu de la rexón. Nun-yos importa ónde. Tres delles llamaes y de dalgún unvíu de semeyes, la pareya decídese por un terrén nuna localidá en Bimenes. A más de 500 kilómetros del so pisu de Madrid. 

La llamada nun ye una anécdota, dicen les inmobiliaries asturianes. Nos últimos meses, esti tipu de veceros son los habituales. Agües abaxo, ta traduciéndose en más obres. Según les cifres que remana la patronal asturiana de la construcción (CAC-Asprocon), a partir de los datos del Colexu d'Apareyadores del Principáu, hasta'l pasáu mayu'l númberu d'obres pa llevantar viviendes unifamiliares más que se dobló. Tramitáronse 275 llicencies pa esti tipu de proyectos, un 61% más que nel mesmu periodu de 2020. Mentanto que la construcción de pisos sigue l'enclín inversu. Les llicencies pa edificar en planta cayeron un 50% nesti 2021. 

Dicen dende un conocíu despachu d'arquiteutos de la rexón que dende va un tiempu'l 80% de los sos proyectos son pa construyir viviendes unifamiliares y el restu, pa pisos. Va unos meses, esto ye, primero de la pandemia, esi porcentaxe yera l'opuestu. 

Más datos. Siero ye'l conceyu que más se ta beneficiando d'esti cambéu d'enclín nel mercáu inmobiliariu asturianu. Nesi conceyu diose lluz verde a 54 llicencies pa construyir xalés, más del doble que va un añu (24). Más allá de la demanda, que según les inmobiliaries ta creciendo a bon ritmu, el presidente de la patronal, Joel García, asegura que munches d'estes tramitaciones pa viviendes unifamiliares llevaben tiempu atrullaes nes oficines de los Ayuntamientos y que ye agora cuando tán saliendo alantre. Al so entender, Siero ta siendo un conceyu modelo. “Ye un conceyu que va espuntar muncho nel futuru, va tener tirón; el Conceyu entainó enforma la concesión de les llicencies y tien muncho terrén pa construyir”, asegura Joel García. Y tien a Amazon, otru aliciente. 

Otra inmobiliaria asturiana cuenta qu'una de les sos últimes vientes foi un xalé pa una pareya de Zaragoza que vien a vivir a un pueblu del conceyu de Siero de 700 habitantes namás. “Nós abrimos en 2017 y esti foi l'añu que más parceles vendimos dende entós”, asegura Javier Merino, de la firma uvieína Ático10. Munches d'elles, precisamente, nel conceyu de Siero. “Y la mayoría de les viviendes que tamos vendiendo son con piscina, que yera daqué qu'enantes nun importaba tanto”, esplica. 

Con esos datos yá puede dase más o menos un perfil de lo que busca'l comprador de viviendes unifamiliares n'Asturies: quier una casa llixeramente desaverada, pero tampoco demasiao, con terrén y, fundamental, con piscina. 

Echando una güeyada a les estadístiques de CAC-Asprocon, hai datos llamativos. Como que los dos grandes conceyos de les cuenques mineres, Llangréu y Mieres, lleven siquier dos años ensin dar nenguna llicencia pa llevantar bloques de pisos. Eso sí, hai que señalar qu'en Mieres nestos dos últimos meses dieron dos llicencies d'obra pa facer dos viviendes unifamiliares. Lloñe del dinamismu d'otros conceyos próximos.