La investigación d'un “enigmáticu” camín perdíu nel parque natural de Redes. Esta ye l'aventura qu'encabeza'l grupu d'investigación histórica de Llaviana “Los Bribones” que, nesta ocasión van tar acompañaos polos especialistes de AT Formación Animal y el so equipu de producción audiovisual, amás de la productora FCS Cinematographer, que van facer un documental col trabayu de los investigadores.

Ún de los tramos del camín allugáu en Redes.

Y ye que les peculiaridaes d'esi camín, que s'alcuentra nún de los llugares más arrequexaos del Altu Nalón, xeneró que los investigadores locales de “Los Bribones” realicen un concienzudu rastrexu y estudiu de los sos restos. El presidente del grupu d'investigación histórica, Arcadio Noriega, destaca que “ye un camín imposible, nun llogramos entender cómo puede esistir un trazáu que remata nuna cayida de trescientos metros y que empecipia nun monte que, prácticamente, rique de cuerdes pa progresar”. Sicasí, el desenvolvimientu d'esta vía nel pasáu tenía una esplicación que Los Bribones van tratar de desvelar, “yá que ye un llugar pol que nun puede aportar un carru, nin siquier una simple parexa de carga, ye daqué raro”. La intención del proyectu programáu ye afondar na memoria histórica de la xente de los pueblos próximos, mesmo que realizar un rastrexu na área d'influencia d'esti camín de los trabayos humanos asociaos al enclave. Tamién pretende reflexase les midíes, composiciones y peculiaridaes de los restos del camín que ta n'estudiu. L'equipu va cuntar, ente otres persones, cola participación tamién del xeólogu Andrés Alonso y l'arquiteutu especializáu n'usos y vezos tradicionales Luis Corte, amás de dellos miembros más del colectivu. 

L'estrañu camín en cuestión ta trabayáu sobre una plataforma de peña caliar onde se retiró material pétreu nunos doscientos metros pa consiguir la meyora y progresión por un serrón a 1.320 metros d'altor. Los sos estremos paecen nun tener solución de continuidá y los accesos preséntense imposibles pal pasu d'un carru, pero con too y con ello, l'enclave tien dos metros y mediu d'anchu y cuenta con murios de carga y refuerzu en dalgún de los sos tramos. ¿Trátase d'antiguos maderistes? ¿Yera un pasu perdíu ganaderu o una llínia de control militar? Estes son delles de les hipótesis que s'embaraxen y que “Los Bribones” va tratar de desvelar.