La zona d'esclusión de Chernóbil ye un descomanáu territoriu de 4.700 kilómetros cuadraos, una estensión equivalente a tola zona central d'Asturies. Ye la zona afectada pola radiación espulsada pol accidente de la central nuclear de Chernóbil, va 35 años. Un llugar que, contra toa lóxica, convirtióse nuna reserva natural de primer categoría. Hasta ellí movióse, en delles ocasiones, el biólogu Germán Orizaola, Investigador Ramón y Cajal de la Universidá d'Uviéu, qu'esti día esbilló la naturaleza de les sos investigaciones y les enseñances de la so actividá n'Ucrania na conferencia “Un biólogo en Chernóbil”, que punxo nel Aula Magna del Edificiu Históricu de la Universidá. 

“Chernóbil enséñanos cómo funciona la ciencia: una zona que se cuntaba diba ser un desiertu nuclear, ye xusto lo contrario: una reserva de fauna y naturaleza como hai poques n'Europa”, esplicó Orizaola. La razón ye l'ausencia del ser humanu, que favoreció'l floriamientu d'una voluptuosa vexetación, y la recuperación d'esos espacios per parte de diverses especies animales. 

“La esperiencia en Chernóbil enséñanos delles coses a nivel de xestión. Si queremos caltener la nuesa fauna, los nuesos osos, urogallos y salmones, Chernóbil diznos cuáles son les meyores opciones, y la importancia d'intentar amenorgar la presión humana nos ambientes nos qu'ellos viven, daqué qu'equí alpenes se fai”, esplicó Orizaola. 

A xuiciu del biólogu, la divulgación de la situación que se vive na zona d'esclusión de Chernóbil, y de les conclusiones que los científicos saquen de la so esperiencia ellí. “Tenemos la necesidá de comunicar lo que facemos, por que la sociedá tea bien informada de la situación actual y del tipu d'acciones que se pueden facer pa caltener la naturaleza. Porque estes enseñances que traemos de Chernóbil pueden sirvinos pa entamar actuaciones de protección de la naturaleza n'otros llugares, y tamién a escala d'Asturies, si ye eso lo que queremos facer”, cavilgó Orizaola.

Bona parte de la conferencia del biólogu céntrase nuna esplicación, de primera mano, de cómo se trabaya nesa zona, per qué tiempu del añu se va y qué fai ellí la Universidá d'Uviéu. Orizaola investigó en territoriu ucranianu la evolución de les renagües (ranita de San Antonio), una especie con unos exemplares alcontraos na zona d'esclusión qu'esperimentaron un cambéu na so pigmentación, quiciabes como midida de defensa énte l'aumentu de la radiación na zona. 

“La última vegada que tuvimos en Chernóbil foi en 2019. Queríemos volver l'añu pasáu, porque tenemos un proyectu financiáu pola Sociedá Británica d'Ecoloxía pa estudiar los caballos selvaxes de la zona, pero cola pandemia aparó tou, y sigue aparao abondo. Esperamos poder volver yá'l próximu añu”, rellataba Orizaola, en conversación con LA NUEVA ESPAÑA, enantes de la conferencia. 

En concreto, esa investigación céntrase nel caballu de Przewalski, una variedá de caballu selvaxe procedente del centru d'Asia que tuvo a piques de la estinción a mediaos del sieglu XX, y del que tán rexistraos alpenes dos mil exemplares en tol mundu. 

En Chernóbil, soltóse un primer grupu d'exemplares en 1998: dieciocho femes y trece machos. Foi l'orixe d'una menada que, magar se viera azotada dellos años pola caza furtiva, asitia yá alredor de los 150 exemplares. L'oxetivu de la investigación na que participa Orizaola pasa por facer estudios xenéticos a estos caballos.