L'acción empieza con un primer planu d'una figura d'un estuzáu San Valentín, pa pasar darréu a centrase nuna modelo que descansa sobre un diván colloráu. Y empieza el baille. Tres la cámara ta'l xixonés, Imanol Ruiz de Lara, un director de cine publicitariu que ta afarando nos festivales internacionales gracies al so últimu curtiu: “Haunted Love”. Un vídeu dientro de lo que se conoz como'l xéneru de “fashion films” (películes de moda), usaes poles marques de ropa pa promocionar los sos productos. Esti trabayu valió-y a Ruiz de Lara pa ser nomináu en seis categoríes del festival “La Jolla International Fashion Filme Festival”. De reconocíu prestíu. Un tanto asina como los Oscar de los vídeos de moda. 

El vídeu en cuestión titúlase “Haunted Love”, que vien a ser amor embruxao. Y les categoríes a les que lu nominaron son les de meyor director y meyor conceutu creativu pa'l mesmu Imanol Ruiz de Lara, meyor baille pa Iker Karrera y Weronika Kaminska, meyor cinematografía pa Rafael Reparaz, meyor director artísticu pa Edu Parrilla y, a lo último, meyor repartu. 

L'artista Xixonés, de 41 años, crióse "na cai Cabrales tola vida” según él mesmu revela. Recibió la noticia de les nominaciones con una gran “felicidá” por tol equipu que participara nel rodaxe ¿La clave del ésitu? “Siempre trato d'arrodiame de talentu, ye un trabayu meticulosu dende la dirección de casting hasta los directores de fotografía, siempre buscamos atopar la meyor atmósfera”, reconoz.

Ruiz de Lara revela que siempre tuvo una conexón especial col cine. Esi venceyu foi, reconoz, “el que me llevo a garrar un bus con dirección a Madrid”. Na capital española estudió Periodismu, pa depués especializase nel mundu audiovisual. “Detrás de les cámares ye onde me siento más cómodu”, revela. N'acabando la carrera, viaxó a Cuba onde siguió los sos estudios na escuela de cine San Antonio. Darréu, volvió a la capital española, pa estudiar nel Institutu de cine de Madrid. El so primer trabayu foi como montador de vídeos pa una productora “ónde aprendí bien dello, foi una bona escuela pa ser depués director” recuerda Ruiz, “foi'l mundu del cine publicitariu'l que m'alcontró a mi, siempre fui trabayando viendo cada oportunidá como un retu”.

El director xixonés.

El director xixonés.

Vien de familia d'artistes y reconoz que “crecer nuna redolada creativa impulsóme a siguir esti camín”. 

El vídeu pol qu'acaba de recibir estes seis nominaciones foi un encargu de la revista Vogue España pa la edición de San Valentín. Usa “la danza como recursu estéticu y artísticu”, señala. Pa llogralo trabayó col coreógrafu Iker Carrea.

Un fotograma de “Europa II”, vídeu empobináu pol xixonés Ruiz de Lara.

Como futuros proyectos y suaños qu'entá-y queden por cumplir destaca: “Quiero enfocame nel xéneru de ficción y aventurame a dirixir llargumetraxes”. Yá tien ente manes dos curtiumetraxes. Siempre detrás de la cámara.