El pasáu romanu d'Asturies descansa a apenes quince centímetros de fondura nunos terrenes próximos a Llugo de Llanera. Esa foi la fondura a la que l'arqueóloga Esperanza Martín y el so equipu empezaron a atopar restos de murios d'un edificiu romanu, presumiblemente de dómina altuimperial, na nueva campaña d'escavaciones empobinada a investigar el míticu enclave romanu de Lucus Asturum. Un nuevu aniciu que s'axunta al atopáu en 2018, cuando Esperanza Martín y el so equipu alcontraron los restos d'un establecimientu termal. 

Lo más importante d'esti nuevu afayu quiciabes nun sía l'edificiu en sí, magar que puede tener una relevancia crucial nel estudiu del pasáu romanu de la rexón. Más crucial entá ye lo qu'empieza a aprucir, en xunto, sumando los afayos d'esta escavación y los d'aquella primer campaña, que se desenvolvió nuna finca amiesta a la qu'alluga los actuales trabayos: lo que ta apruciendo en Llamorgal ye una trama urbana. A esa escasa fondura, a apenes una cuarta de la superficie, fuelga un núcleu de población, d'una naturaleza y un valumbu entá por concretar. Pero lo que ta escavando Esperanza Martín nun ye una villa aisllada, sinón otra cosa. 

“La orientación d'estes nueves construcciones recién descubiertes correspuende cola percibida nes termes escavaes en 2018. Asitien en paralelo y perpendicular con aquel edificiu, lo que nun ye anómalo: si hai una exa de circulación ye normal que los edificios asitien en paralelo o perpendicular a la vía”, esplica Esperanza Martín, qu'añede que “conxugando los trabayos de prospección xeofísica coles resultancies de les escavaciones, tanto d'esti añu como d'otres campañes, albidramos la presencia d'una posible trama urbana”. Dicho otra manera: aquel establecimientu termariu y esti segundu edificiu probablemente taben na mesma cai.

Pela esquierda: Ramón Rodríguez (director del RIDEA), Eva María Pérez (conceyala de Cultura), Esperanza Martín (col so perru “Teebo”) y Gerardo Sanz, nel xacimientu.

Hasta'l momentu, los arqueólogos desaterraron trés estancies d'esti segundu edificiu, amás d'un espaciu de tránsitu o de circulación con suelu fechu de latericio machucáu, que respondería a un pasiellu o un tramu de circulación interior del edificiu. Los arqueólogos tamién alcontraron lo que paez ser un pozu, y nos mesmos murios del edificiu pueden identificase distintes dómines constructives. “Indícanos qu'hai delles fases d'ocupación, y vese cómo un muriu se superpón a otru en delles estancies: son ampliaciones. Alcontremos un edificiu principal y depués lo qu'hai son estancies añedíes: lo que se ve ye cómo se van superponiendo los murios, son estancies añedíes en fases d'ocupación posteriores”, esplica l'arqueóloga. 

L'equipu d'arqueólogos, estudiantes y voluntarios que dirixe Esperanza Martín ta atopando amás munches más facilidaes que naquella campaña de 2018 na escavación. “La preservación de los restos ye francamente bona. Esto vien de que tuvimos la terrible suerte de qu'esta faza nun tuvo mui afectada polos llabores agrícoles, porque nesta finca llantóse de manera regular remolacha y a esi tipu de plantíos nun-yos fai falta que'l llabiegu afonde muncho”, esplica. Ello ye que la escavación avanza a tan bon ritmu que l'equipu yá amplió'l primer ámbitu de trabayu, precisamente escontra la zona más próxima a la Ería de la Castañera, la finca na que se fixo la primer escavación

Tocantes a la datación d'esti nuevu afayu, l'arqueóloga señala que los primeros nicios apunten a una ocupación ente finales del sieglu I y empiezos del II de la nuesa era. A eso apunta la cultura material que los arqueólogos tán recuperando nestos primeros díes d'escavación, anque Esperanza Martín llama a la prudencia: “Hai qu'afondar más, tenemos que facer la datación en función de los suelos. Con un pocu de suerte, inclusive podríemos atopar un vertederu que nos afite un pocu más esa datación”, señala. 

Como novedá, esti añu l'equipu arqueolóxicu acuta caldía un pocu de tiempu, siempre a les 13.30 hores, pa realizar visites empobinaes. En Lucus Asturum toos son bienveníos sacantes los furtivos, la llaceria de les escavaciones arqueolóxiques. 

Los trabayos en Llamorgal van enllargar hasta'l 15 d'agostu. Pero la busca del míticu enclave romanu nun se va cerrar con esta campaña, sinón que'l Conceyu de Llanera, que financia les escavaciones, avanzó que va siguir invirtiendo nestes investigaciones, siempre na midida de les sos posibilidaes pero de xeitu regular y continuu, xusto lo que necesiten los investigadores. “Los espertos dícennos qu'equí, debaxo d'esta tierra, hai daqué pergrande”, señala. El rexidor insiste que quier caltener campañes tolos años, yá sían escavaciones o trabayos de llaboratoriu. “Tenemos cada añu 18.000 o 19.000 euros nos presupuestos municipales pa estes campañes, queremos afayar la hestoria del nuesu conceyu”, precisa Sanz.