Hai vegaes que de los peores momentos salen les meyores idees. Ye lo que-yos pasó a Sandra Lauzurica, Eider Hoyos ya Iñigo Martínez De Alegría, qu'aprovecharon el confinamientu pa escurrir un escape room, que trunfó nel País Vascu y que llega esti branu a Asturies. La so esperiencia, llamada Escape Bask, ye un proyectu del grau universitariu en LEINN (Lideralgu, Emprendimientu ya Innovación), ufiertáu pola Universidá de Mondragón (Guipúzcoa).

Esti escape room consiste nuna actividá de turismu al aire llibre, que se desenvuelve en dos destinos sorpresa mientres s'intenta resolver un asesinatu. “Mientres xuegues, vas afayando. Empezamos n'Euskadi y esti branu vamos tar en dos llugares d'Asturies”, afirma Sandra Lauzurica, una de les entamadores del proyectu. Al acutar la to entrada a partir de la web llégate un paquete policial a casa qu'inclúi les pistes y tola información que fai falta de mano pa xugar. A partir d'ehí, toca pescudar quién ye l'asesín, pa lo que los participantes van tener qu'utilizar oxetos de la cai, interactuar col comerciu local… y más.

Dos participantes nel escape room faciendo una de les prebes

Dos participantes nel escape room faciendo una de les prebes Escape Bask

La ficción qu'Escape Bask trai a Asturies ye'l “Caso Octaedro”, onde se busca a un asesín en serie de neños y neñes, qu'apaecieron ensin vida con un mesmu patrón. La duración del escape room ta ente les 3 y 4 hores ya inclúi tamién una guía d'encamientos turísticos pa visitar tres la esperiencia. Estos universitarios vascos dicen tar encantaos col ésitu que ta teniendo'l proyectu: “Tamos percontentos, sobremanera polo que nos dicen los veceros”. 

El proyectu nació na dómina post-pandemia. “Tuvimos trabayando a la fin del confinamientu en facer daqué onde nun hubiera riesgu de contaxu, gustónos la idea y vimos una bona oportunidá”, señala Lauzurica, que s'encarga de xestionar la páxina web. Magar ser un proyectu totalmente adaptáu a la situación sanitaria actual, con toles actividaes al aire llibre, esti últimu añu tuvieron delles dificultaes. Les restricciones pol coronavirus torgaben salir de la provincia polo que'l saltu del proyectu a Asturies tuvo qu'esperar al branu

Sicasí, l'ameyoramientu na situación sanitaria yá permite'l so allampáu desembarcu nel Principáu y yá se pueden acutar entraes al traviés de la so páxina web. Ye'l veceru'l que decide'l día que quier realizar la visita (avisando cuando menos con siete díes d'antelación). L'actividá entámase alredor de coches y el preciu ye de 75 euros por vehículu, ensin importar la cantidá de pasaxeros per coche. Ye un misteriu qué destinos asturianos van acoyer l'escape room, pero paez una actividá ideal pa pasar un bon ratáu con amigos mientres esti branu.