Quince díes primero de coronar l'Elbrús, el monte más altu d'Europa, la uvieína Isabel Argüelles nun s'imaxinaba que terminaría a 5.642 metros d'altitú arrodiada d'un grupu de montañeros a los qu'enxamás viera enantes. N'Emiratos Árabes, onde trabaya dende fai menos d'un añu, vio una oportunidá na web d'esguilar al monte del cordal del Cáucasu y nun lo pensó. Apuntóse, echó una mochila de diez quilos al costazu y empezó a correr 22 kilómetros diarios. Ella reconoz que puede abultar “una llocura”, pero lleva esguilando dende l'adolescencia. 

N'Asturies tuvo'l so primer contactu col monte, pero d'otra forma. So padre, que comparte la so pasión, llevóla dende bien pequena con él peles cimes asturianes, que nun tienen nada que ver col xelo rusu. Agora, acabante llegar de la espedición, cuenta que-y encantaría volver al Principáu y “esguilar al Urriellu”. De momento, coronó'l monte rusu, el más altu del continente, y el que marca la frontera histórica ente Asia y Europa. “Toi mui contenta y arguyosa de mi mesma y les mios capacidaes”, sentencia Argüelles en falando de la so fazaña.

Isabel Argüelles, tres coronar l'Elbrús.

Anque tuvo rellacionada col monte dende pequeña, por cuenta de la afición de so padre, l'amor pola esguilada nació cuando marchó a Madrid. Cansó llueu de “los típicos planes de siempre” y decidió investigar pola so cuenta qué más podía facer. “Interesé otra vuelta pel monte y empecé a esguilar na Comunidá de Madrid, pero llueu quixi más”. Agora, con 33 años, la uvieína decidió cumplir un suañu que nunca creyó tener de neña. Convirtióse nuna de les poques asturianes que coronaron un “cincomil”. 

“Esti ye de normal un deporte d'homes. Cuando empecé yera raro ver muyeres, y nesta última travesía yéramos once persones, diez homes y solo una muyer, yo”, cuenta emocionada recordando la so ascensión. “Prestome pola vida. Nun creo que sía una esperiencia pa tol mundu porque ye mui difícil mesmo física que mentalmente, pero al que tea dispuestu diría-y que p'alantre. Ye una esperiencia inolvidable”, rellata. Non solo hai qu'enfrentase a una llarga travesía ente'l xelu y la nieve, tamién hai que sobreponese a la falta d'osíxenu.

A unos metros de la cima, la uvieína creyó esmorecer. Cuenta que frenó unos segundos y, a más de cinco mil metros d'altitú, solo esi curtiu descansu la ayudó a volver alendar. Llegó a pensar que l'agotamientu nun la diba dexar coronar “el techu d'Europa”, pero l'arguyu pudo más. Ente'l ruiu del monte díxose “agora tienes que dir pasu a pasu” y, a lo último, llegó a la cima. Agora piensalo y reafítase nel desafíu que s'impunxo. “Punxime a preba col Elbrús”, sentencia. 

Magar los años en montes y rocódromos, Argüelles descubrióse como una escaladora ambiciosa tres esta aventura y afirma que quier siguir coronando montañes. “El mio próximu oxetivu ye xubir un ochomil, como'l Cho Oyu, en China. Y, evidentemente, coronar l'Everest ye un suañu que quiero cumplir, nun creo qu'haya nengún escalador que nun lo quiera facer”, comenta ente rises.