L'Hospital de Cabueñes recibió'l 20 de xunetu a los 60 residentes colos que cunta esti añu, una cifra récord dempués de que nengún recién graduáu refugara la so plaza. Y, de toos ellos, el más brillante ye Pablo Miguens, futuru pediatra que quedó na posición 245.º nel MIR, el segundu meyor calificáu de toa Asturies. La so ventaya dexaríalu escoyer plaza en casi cualquier hospital d'España, pero decantóse por Cabueñes porque, diz, nagua por trabayar na ciudá. “Soi de Xixón y esta ye la mio casa, y prestaríame poder quedar equí siempre que me dexen”, defende. 

Cuando se publicaron a mediaos de mes les llistes d'almitíos, que'l númberu 245 escoyera Cabueñes estrañó, pa bien, al sector. Estudiantes tan bien asitiaos suelen apuntase n'hospitales piqueros de Madrid y Barcelona. “Lo que pasa ye que Cabueñes tien lo meyor de dambos mundos. Ye un hospital relativamente grande, con un bon volume de pacientes que dexen ver muncha patoloxía. Al empar, nun ye tan grande y tien les coses bones d'un hospital pequenu nel que nun hai servicios enormes. En La Paz de Madrid hai 20 residentes per añu, y yo nun quería eso”, esplica'l mozu facultativu. Yá tuviera nel complexu xixonés mientres les sos práctiques y, cuenta, namoróse del serviciu lideráu por Nuria Fernández. “Llamóme l'atención enforma porque los vi a toos mui implicaos na docencia y l'ambiente de trabayu abultábame espectacular. Vía a los residentes y pensaba: yo quiero ser asina. Yá sabíen munches coses. Y ye que me paez esencial tar nun llugar con bon ambiente”, defende l'aventayáu. 

A los sos 24 años, Miguens quedó na posición 245 de los más de 13.000 aspirantes del país. La preparación, diz, “foi llarga y complicada”, con más d'un momentu de “aforfugu y baxón” potenciaos pola incertidume que causó la pandemia. “Nun sabíemos cuándo diba ser l'exame y la elección de places volvió ser telemática cuando yá l'añu pasáu dio problemes”, critica'l mozu, que recuerda que de pequeñu, cuando-y preguntaben qué quería ser de mayor, respondía: “Cualesquier cosa menos médicu”. “Dábame mieu”, razona. Yá nel institutu la idea de facer Medicina resultó-y interesante y, por mor de les práctiques en Cabueñes, confirmó la so vocación como pediatra. “Mui mal me lo tendríen que poner pa que nun me quede n'Asturies”, anuncia. 

Miguens ye un representante d'una abondosa promoción que va pasar los próximos meses en Cabueñes, nun momentu especialmente enguedeyáu porque la pandemia entá ta llueñe de convertise en daqué del pasáu. Pero tanto él como'l restu de los sos compañeros afronten el retu cola máxima ilusión.