Mieres algamó en 1960 la cifra de 70.871 habitantes. Daquella Fábrica de Mieres entá yera la gran locomotora económica non yá de la cuenca del Caudal, sinón d'Asturies. La puxanza demográfica abultaba imparable. P'hacia 1970 Fábrica de Mieres esbarrumbó y nos noventa intensificóse'l zarru de mines. El resultáu ye que Mieres tien anguaño 37.537 vecinos. En pocu más de mediu sieglu'l conceyu perdió casi 34.000 habitantes, l'equivalente a la población de Llaviana, L.lena y Ayer xuntos. 

“Perda de población y avieyamientu son una combinación mui peligrosa, más tovía si se suma la perda d'empleos. Tamos nuna situación na que yá nun se puede perder más tiempu. Pero entá hai marxe pa reconducir les coses”. Esti camientu del alcalde, Aníbal Vázquez, recueye la esmolición municipal ante l'imparable despoblamientu que sufre'l conceyu. La oposición echó-y en cara en delles ocasiones al gobiernu local d'IX la so “pasividá” y falta d'iniciativa énte'l decadente enclín demográficu. Los xestores municipales retrucaron que centren los sos esfuerzos en revertir la situación, pero insisten en que “ensin el respaldu del restu de l'alministración ye una xera inviable”. 

Nesti contestu, Mieres yá tien menos de 38.000 habitantes. En concretu, el conceyu cuntaba a primeros d'añu con 37.537 vecinos censaos. Despidiera 2018 con 38.428 habitantes, polo que la fuga abierta nel cascu de la estructura demográfica sigue llueñe d'atopar igua. 

El cayente demográficu en Mieres sigue quemando etapes a un ritmu esmolecedor. El conceyu empecipió'l sieglu cayendo per debaxo de los 50.000 habitantes y llegó a 2020 ensin poder superar la barrera de los 38.000. Agora bien, el tránsitu de 2019 a 2020 dexó una llixera meyora no que se refier al ritmu del imparable retrocesu demográficu. Con tou, el mayor güelpe amestáu al despoblamientu producióse col cambéu de sieglu. Tres más de mediu sieglu de retrocesu, l'imparable enclín a la baxa caltiense ensin que se columbre un cambéu.