Asturies y Galicia son les rexones d'España con mayor potencial pa xenerar eletricidá coles foles. Destácalo la “Hoja de ruta para el desarrollo de la eólica marina y de las energías del mar en España”, qu'acaba d'ellaborar el Ministeriu pa la Transición Ecolóxica. El borrador del documentu conseña que n'Asturies la enerxía de les foles, tamién conocida como undimotriz, “dispón de recursu de gran calidá pa la so viabilidá y desenvolvimientu” y que n'otres rexones con menores posibilidaes como'l País Vascu yá tienen plantes de producción eléctrica a escala comercial

Asturies mira p'hacia'l mar pa siguir siendo una rexón productora d'enerxía tres el zarru de les centrales térmiques de carbón, pero lo que ve son molinos xigantes. Aliances d'empreses enerxétiques como les formaes por EDP y Engie –qu'entamaron la sociedá Ocean Winds– y Naturgy y Enagás remanen proyectos pa construyir parques eólicos marinos flotantes frente a la mariña asturiana. “Apostamos dafechu pola eólica offshore como actividá de xeneración enerxética compatible cola protección del mediu ambiente y impulsora de cadena de valor industrial”, destacó Belarmina Díaz, directora xeneral d'Enerxía del Principáu, na so participación esti día en Citech.

Na estratexa de transición enerxética xusta ellaborada pol Principáu apuéstase por “impulsar l'aprovechamientu d'enerxíes anovables marines”, pero namás se fai referencia de manera específica a la eólica marina flotante y ello magar la Fundación Asturiana de la Enerxía (FAEN) yá ellaboró fai una década un estudiu nel que se conseña la potencialidá de la enerxía undimotriz na rexón

Agora'l Ministeriu pa la Transición Ecolóxica vuelve reparar nello na so fueya de ruta de les enerxíes del mar. Apunta que Galicia presenta los valores de potencial d'enerxía de les foles más elevaos d'España, con potencies medies d'entre 40 y 45 kW/m, y que'l mar Cantábricu ye la segunda zona tocantes a recursu con alredor de 30 kW/m que van menguando d'Oeste a Este. Esto ye, que'l recursu ye más eleváu n'Asturies y pierde fuerza según s'avera al golfu de Vizcaya. Y asitia como tercer llugar d'España con potencial la fachada Norte de les isles Canaries, con potencies medies de 20 kW/m.

Los dispositivos

El documentu ellaboráu pol ministeriu que dirixe Teresa Ribera conseña que les tecnoloxíes d'enerxíes de les foles presenten un ampliu abanicu de dispositivos probaos, “pero ensin converxer inda a un diseñu común y a pequena escala”. Asina, según la forma de captar el folaxe, hai dispositivos flotantes –que se mueven siguiendo a les foles y que dexen convertir la enerxía mecánica de la fola n'eletricidá–, dispositivos somorguiaos y dispositivos denominaos de columna d'agua cañicante (OWN, poles sos sigles n'inglés). Nestos últimos dispositivos nun son les foles les que mueven les turbines directamente, sinón una masa d'aire estruyíu que ye emburriada poles foles. Asíatiase na llínia de la mariña en rompefoles o diques, n'escolleres de puertos o en plataformes flotantes. Ye'l sistema que s'utilizó nel País Vascu, onde'l potencial d'aprovechamientu ye menor que n'Asturies. 

La fueya de ruta del Ministeriu pa la Transición Ecolóxica destaca'l proyectu pioneru de la planta d'enerxía de les foles de Motrico –con una potencia instalada de 296 kW y allugada nel dique esterior del puertu de la localidá guipuzcoana– por ser la primer instalación comercial nel mundu que funcionó inyectando enerxía eléctrica xenerada poles foles a la rede. 

“Dende'l so entamu en 2011, la planta d'enerxía de les foles funcionó ininterrumpidamente, convirtiéndose na planta más llonxeva del mundu, la que más enerxía xeneró y vendió a la rede y la que más hores de funcionamientu y disponibilidad atropa”, conseña'l documentu, que tamién prevé “una importante amenorgamientu de costos” gracies a les economíes d'escala y les meyores tecnolóxiques.