Daqué falla cuando al pasar al pie d'un llagu d'orixe glaciar –a casi 1.700 metros d'altitú y enclaváu en plenu corazón d'un parque natural– un alcalde confiesa albidrar que ta visitando la piscina municipal y un montañeru, la sensación de tar transitando per una carretera comarcal. La disonancia obedez a un mesmu problema, el creciente usu del llagu Ubales, un emblema de Redes, como zona de bañu, daqué que ta prohibío dafechu. El segundu despropósitu –según denunciaron nes redes sociales los senderistas habituales de la zona– ye que, p'atayar estos comportamientos, asitiáronse dos señales metáliques, asemeyaes a les qu'ún puede atopar nuna cai o una carretera, pocu acordies con ún de los paraxes más emblemáticos de tola rexón. 

Ún de los primeros n'atopar coles señales –que prohiben el bañu y sollerten de la fraxilidá del ecosistema del llagu Ubales, con especies de flora y fauna mui poco comunes n'España– foi'l montañeru de L'Entregu Cristian Menéndez, esti fin de selmana. “Suelo salir a correr pel monte. Diba con unos amigos y cuando lo vimos nun dábemos creitu; quedamos de piedra. Un amigu tuviera la selmana anterior y nun viera nada”. El respigu foi mayor poles condiciones meteorolóxiques de la xornada. “El día taba borrinosu y paez que'l color roxu de la señal y el metal inda se víen más”, indica esti montañeru, qu'añede: “Espero que rectifiquen y lo quiten porque dan ganes de llorar. N'otros sitios d'Asturies como'l llagu Enol tamién hai señales, pero amañoses pa la redolada. Equí abulta que tas na cai Uría”. 

Menéndez reconoz que sí facía falta asitiar dalgún tipu d'alvertencia “porque ye verdá que cada vez se baña más xente nel llagu y eso puede estropiar el so ecosistema”, anque diz que les señales podríen diseñase con otru formatu y usando otros colores y otru tipu de materiales

Tampoco podía despintar el so descontentu otru de los montañeros que visita con frecuencia'l llagu Ubales, Javier Fernández. “Ye una llocura. Ver una señal asina nun sitiu como esti ye como si atopares con un semáforu o un pasu de cebra nuna pista forestal. Nun tien sentíu, ye una aberración. Nun creo nin que la mesma normativa del parque dexe asitiar esti tipu de señalización nun espaciu tan emblemáticu”. 

L'allugamientu de les señales correspuende al Principáu que ye l'alministración encargada de la xestión del parque natural. L'alcalde de Casu, Miguel Fernández, amosó'l so desalcuerdu col tipu de señales escoyíes, anque foi más allá y recalcó los motivos que llevaron a tener qu'instalales. “Comparto que nun son les señalizaciones afayaíces y que quiciabes teníen que facese de madera. Ye daqué que nun ye competencia del Conceyu y nun sé si inflúi que teamos falando d'un paraxe a más de 1.600 metros d'altitú, que se ve sometíu a condiciones climatolóxiques bien adverses pel iviernu y eso puede afectar a la elección de los materiales”. 

“Sía que non” –añedió'l rexidor– “el problema de fondu ye qu'haya qu'asitiar esti tipu de señales por que la xente nun se bañe nel llagu. ¿Ye que nun sabemos que ye daqué que ta prohibío nuna zona como esta que ye parque natural y ta protexida?”, s'entrugó. 

Fernández denunció la proliferación d'improvisaos bañistas nel llagu, que tamién utilicen de forma ocasional les mascotes. “Yo sentíme avergoñáu cuando pasé xunto al llagu Ubales y tengo visto a tanta xente y a dellos perros bañándose ellí. Tuvi la sensación de tar na piscina municipal. Quiero dicir a los montañeros que criticaron la instalación d'estes señales que tamién llamen l'atención sobre esti tipu de comportamientos cuando los vean porque ye daqué que tien de correxise”, concluyó l'alcalde casín.