El Festival Intercélticu de Lorient, que torna esti añu tres el parón del añu pasáu pola pandemia, celebra'l so 50.º aniversariu col estrenu mundial de la nueva obra del compositor asturianu Ramón Prada. Lleva por títulu “Tierra” y ye un encargu del festival, dirixíu pol asturianu Lisardo Lombardía, y de la Orquesta Sinfónica de Bretaña. L'estrenu d'esta composición, un cantu a la fuerza de la tierra y de la tradición ancestral, onde l'autor introduz per primer vegada la voz tradicional masculina, va tener la participación de los cantantes Xosé Ambás y Ramsés Ilesies, y la gaita de José Ángel Hevia, l'intérprete más internacional de música tradicional asturiana. L'estrenu de “Tierra” va ser esti próximu día 9 d'agostu.
El Festival de Lorient, qu'esti añu va tener un formatu más menguáu poles restricciones de la pandemia, empieza'l día 6 d'agostu. Asturies tamién va tar representada nel zarru de la programación musical nesta ciudá bretona. Va ser el sábadu 14, cola actuación del grupu de folk “Felpeyu”.
El llavianés Lisardo Lombardía va dexar la dirección del certame depués de 14 años al frente
Esta edición del festival dedicáu a la cultura celta va ser tamién la postrera na que tea empobináu pol asturianu Lisardo Lombardía. Dende 2007, Lombardía ye director xeneral del festival musical de referencia del Arcu Atlánticu nel ámbitu de la música tradicional. Tres catorce años viviendo en Lorient, Lombardía decidió tornar a Uviéu y dexar el testigu “a xeneraciones vinientes bretones”. Lombardía refiérse a Bretaña como la so “casa” y nun atuña colos afalagos hacia una rexón “que construyó un festival en creación permanente, onde siempre prevalecieron les idees, la perseverancia y el saber facer d'acomuñar estes cultures céltiques tan diverses y espardíes xeográficamente, pero tan asemeyaes na so esencia”. Nel so haber tien la organización d'un certame qu'enantes de la pandemia axuntaba “ente 600.000 y 800.000 persones. Anque esti añu, por motivos de seguridá evidentes, llindemos l'aforu máximu a 200.000 persones”, precisa esti defensor de la cultura tradicional asturiana, nacíu en La Pola Llaviana en 1955, médicu de formación y que mientres 18 años dirixió'l Club Prensa Asturiana de LA NUEVA ESPAÑA.
El Festival de Lorient marcóse siempre como oxetivu espublizar y compartir la cultura tradicional de raigañu celta esistente n'Escocia, Irlanda, Isla de Man, Bretaña, Gales, Asturies y Galicia. El certame tenía un presupuestu de 6 millones d'euros, pero cola pandemia amenorgó a un 80% de la so magnitú. Yá nun va haber presencia de los bailles y los desfiles que solíen enllenar les cais d'esta localidá bretona.
El 50.º aniversariu diba facese en 2020, pero tuvo qu'aplazase pola pandemia. Pa esta celebración diseñó esti proyectu especial denomináu “Finisterres celtiques”, nun macroconciertu entamáu por una obra de raigañu celta que va ser interpretada por ún de los países célticos miembros y siguíu por dieciséis músicos solistes.
