El palaciu de los Díaz Miranda, na localidá de la parroquia moscona de Vayu, tamién conocíu como El Barreiro, ta a la venta por 1,8 millones d'euros. Esta xoya del sieglu XVIII, que foi rehabilitada en dellos momentos de la so hestoria recién y que s'alcuentra en perfectu estáu de caltenimientu, ta arrodiada d'una finca de 40.000 metros cuadraos y tien una capiya amiesta de la mesma dómina de construcción del edificiu principal.
La propiedá, un palaciu rural asturianu, ye de planta cuadrangular y tien un patiu central dende'l que se pasa a la parte de vivienda principal, que tien una distribución de dos plantes más bufarda. Esta zona de la casa tien ocho habitaciones, cinco baños, un comedor con una gran chimenea de piedra y una biblioteca empotrada de madera, un gran salón, una oficina y una bodega, según esplica la inmobiliaria The Singular Space, que la tien a la venta.
Según la información qu'ufierta l'Ayuntamientu de Grau sobre esti palaciu de Vayu, ún de los edificios d'interés del conceyu, nel inmueble destaca “el bon trabayu de cantería nel recercáu de los vanos”. Tamién “llama l'atención la decisiva simetría del plan de construcción del inmueble, una y bones l'alzáu ye únicu, rotundamente cuadrangular, y con un patiu interior d'idénticu diseñu xeométricu, a partir del que se pasa a les distintes dependencies”, esplica'l Consistoriu.
La fachada principal, sorraya coles mesmes l'Ayuntamientu, consta d'una puerta adintelada sobre la que s'alluga un balcón de rexería y “remata'l conxuntu l'escudu de la familia, que campea nún de los llenzos”.
Incide tamién la promoción municipal del inmueble nes característiques de la capiya apegada y el so retablu interior. “La entrada ye un gran arcu zarráu con una guapa rexería rematada con una espadaña de perfil irregular coronada por cinco pináculos, que dexa ver l'interior”.
