Ye la xoya somorguiada de la naturaleza asturiana. El Gobiernu acaba d'ampliar l'área marina protexía d'El Cachuchu, qu'en 2011 convirtióse na primer zona con protección ambiental n'España. Esi “parque nacional” somorguiáu ye un monte submarín asitiáu nel Cantábricu, a unos 65 kilómetros de la mariña de Ribeseya, na plataforma continental que se llevanta de sópitu dende los más de 4.000 metros de fondura de la llanera abisal del golfu de Vizcaya hasta los 425 metros del so cume.

Con esta ampliación, l'área marina protexía d'El Cachuchu tien una superficie total de 261.664,46 hectárees (tenía 234.950,33). Les particulares característiques xeomorfolóxiques del bancu, que favorez la presencia d'hábitats amañosos pal asentamientu d'organismos vulnerables de gran porte como corales y esponxes, xunto cola importante dinámica de les agües circundantes, añeden una gran producción biolóxica y condicionen la presencia d'una elevada biodiversidá.

N'El Cachuchu identificáronse cuatro hábitats amenaciaos: agregamientos d'esponxes de fondura, petones de corales d'agües fríes, comunidaes de montes submarinos y comunidaes de pennátulas y de megafauna escavadora. Hai una gran diversidá y riqueza biolóxica. N'El Cachuchu, “los Picos del Cantábricu”, pueden atopase delles especies protexíes, ente les que destaquen el chicharreru (delfín mular) y la tortuga boba.

Les que vienen darréu son toles sos característiques.

Qué ye: 

El Cachuchu ye un gran monte submarín asitiáu nel mar Cantábricu, a unos 65 km de la mariña asturiana de Ribeseya, na plataforma continental española que se llevanta de sópitu dende los más de cuatro mil metros de fondura de la llanera abisal del golfu de Vizcaya hasta los 425 metros del so cume.

Cuánto espaciu ocupa: 

L'Área Marina Protexía tien dende agora una superficie total de 261.664,46 hai (tenía 234.950,33) tres l'ampliación de 4,3 milles náutiques (8 km) escontra l'oeste.

Cómo s'estrema: 

Nel espaciu protexíu y la so redolada hai 4 provincies fisiográfiques principales: la turria, el techu del bancu o monte submarín (El Cachuchu), la cuenca interna y el cañón de Llastres.

Cómo ye: 

El bancu mesmamente tien un llargor d'unos 72 km na so exa este-oeste y sobre 15 km na exa norte-sur. Tien un visu prácticamente planu con una fondura media aprosimao d'unos 500 m y una fondura mínima de 424 m, y ta dixebráu de la plataforma continental cantábrica por una cuenca interna, de 25 km d'anchu y alredor de 850 m de fondura na so rexón más somera. Nel so llau norte presenta unes parés pindies que cayen hasta la llanera abisal asitiada a 4400 m. El fondu del cañón de Llastres tien una fondura media d'unos 2.000 m. Trátase, asina, d'un bancu de grandes dimensiones y fondu. 

Característiques ecolóxiques: 

Les particulares característiques xeomorfolóxiques del bancu, que favorez la presencia d'hábitats amañosos pal asentamientu d'organismos vulnerables de gran porte como corales y esponxes, xunto cola importante dinámica de les agües circundantes, añeden una gran producción biolóxica y condicionen la presencia d'unos elevaos valores de biodiversidá.

Hábitats amenaciaos o en cayente

N'El Cachuchu identificáronse 4 hábitats amenaciaos: Agregamientos d'esponxes de fondura; Petones de corales d'agües fríes; Comunidaes de montes submarinos y Comunidaes de pennátulas y de megafauna escavadora

La so importancia pa la pesca: 

Ye un área imprescindible pal caltenimientu de les pesquerías que se realicen nes zones próximes de la plataforma del mar Cantábricu, convirtiendo El Cachuchu nuna fonte o reserva de recursos pesqueros d'enorme valor. Los adultos reproductores de delles especies d'interés comercial como la llocha o brótola de fango; el lliriu o bacaladilla; el tosquile; el cabrachu de fondura; o la cabra d'altor qu'atopen nesti área un hábitat esencial pa la so reproducción o son bien abondoses nel bancu na dómina de puesta.

Qué fauna alluga: 

Hai una gran diversidá y riqueza biolóxica. Ta compuesta mesmo por especies típiques de los montes submarinos oceánicos como por otres más propies de los fondos de la plataforma, lo que permite esplicar la so gran diversidá biolóxica. Identificáronse siquier 740 especies sobre los sos fondos, seis d'elles nueves pa la ciencia.

Qué especies protexíes: 

N'El Cachuchu pueden atopase delles especies protexíes, destacando nel llistáu'l chicharreru (delfín mular, Tursiops truncatus) y la tortuga boba (Caretta caretta). Amás del chicharreru, tiense constancia de la presencia d'exemplares de distintes especies tales como delfín llistáu, delfín común, rorcual aliblanco, rorcual común, cachalote, calderón común y zifio de Cuvier. 

Qué especies amenaciaes:

N'El Cachuchu pueden alcontrase cuando menos 14 especies (9 especies de pexes, 2 especies de reptiles, 3 especies d'aves). Les especies de pexes son la raya noriega, el reló anaranxáu, el tiburón quelvacho, el tiburón pelegrín y los atunes. Ente les especies d'elasmobranquios más frecuentes figuren los tiburones de fondu mesmo que les rayes Raja clavata y Raja montagui. Tocantes a los reptiles: rexistróse la presencia d'exemplares xuveniles en pasu de tortuga boba (Caretta caretta) pela primavera y el branu, especialmente nel mes d'agostu, pola mor del afloramientu branizu de la zona. Otra especie columbrada dacuando nel mar Cantábricu, especialmente na estación de seronda (ochobre-avientu), ye la tortuga laúd (Dermochelys coriacea). 

Importancia pa les aves: 

L'espaciu protexíu d'El Cachuchu atópase amás estratéxicamente asitiáu pa la migración d'aves marines. Ye una zona bien importante, principalmente ente finales de branu y principios de la seronda, cuando la franxa cantábrica y Galicia concentren un gran fluxu d'aves migratories provenientes del norte d'Europa y del Atlánticu norte. Siquier trés especies con presencia regular nesta zona tán incluyíes na llista inicial d'especies y hábitats amenaciaos o en cayente del conveniu OSPAR. Ente les especies migratories ye frecuente la pardela balear, el charrán rosáu, l'arao común y la gavilueta tridáctila.

¿Qué pasa cola pesca?: 

El visu del bancu d'El Cachuchu constituyó una cala de pesca, dende principios de los años 70, dirixíu a diverses especies como tosquile, besugu, llocha, tiburones de fondura, cabralloca (cabra de altura), abril (bacaladilla) o llagostín (cigala), ente otres. Nel añu 2011, de resultes de la declaración como Área Marina Protexía y Zona Especial de Caltenimientu, entró a valir el zarru de toles pesqueríes nesti espaciu con artes que tuvieren en contactu col fondu, a esceición del palangre de fondu, pal que se caltuvo un permisu especial a una llista zarrada de barcos pal desenvolvimientu d'esta pesquería al sur del paralelu 44º