Les poblaciones indíxenes d'Asturies yá conocíen la metalurxa del oru y la plata primero de la llegada de los romanos, que se dedicaron a la esplotación aurífera d'un territoriu güei asitiáu nel suroccidente de la rexón. Esta tesis foi confirmada gracies a un estudiu del Conseyu Superior d'Investigaciones Científiques (CSIC) ellaboráu a partir de restos atopaos nes escavaciones del castru d'Alava (Salas), un proyectu qu'empezó en 2018 y qu'esti llunes encara la so cuarta campaña, agora centrada n'atopar posibles restos d'ocupación doméstica dientro de la cortil cercada del castru.

El trabayu del CSIC, robláu por Ignacio Montero y Óscar García-Vuelta, del Llaboratoriu de Microscopía Electrónica y Microanálisis del Conseyu Superior, analizó dellos restos cerámicos atopaos nel castru d'Alava mientres unes escavaciones que son iniciativa de la Fundación Valdés-Salas y que tienen el patrociniu de la empresa minera Orovalle y de la Fundación Banco Sabadell. Esti trabayu sofita les conclusiones d'un estudiu previu realizáu l'añu pasáu. “Los resultaos vienen verificar que nesti xacimientu fixéronse actividaes metalúrxiques mesmo con metales de base cobre –bronce y bronce plomao– como con metales preciosos –oru y plata– nes cronoloxíes señalaes polos escavadores (sieglos IV al II enantes de Cristu)”, detalla la conclusión de trabayu.

Les resultancies del analís del CSIC confirmen la maña que los pobladores del castru d'Alava, yá na Edá del Fierro, teníen a la de trabayar los distintos metales. Los restos onde s'atoparon estos indicadores de trabayos con metales nobles son de material cerámico y fueron atopaos no que sería un vertederu; son los restos y escories del pequenu taller qu'habría nesti asentamientu. “La composición del únicu restu d'oru conseñáu paez indicar la so condición d'oru aleao, coincidiendo coles aleaciones emplegaes davezu na orfebrería castreña”, indica l'analís del CSIC al entamar la novedá del estudiu, porque hasta agora nun se teníen atopao nicios del trabayu con oru nel asentamientu d'Alava. Tamién l'analís del CSIC fai una alusión a la presencia de la plata: “Ye de rescamplar l'alta pureza media vista nos restos de plata, anque en dellos casos atópense bien alteriaos”.

Joaquín Lorences, catedráticu de Fundamentos del Analís Económicu y presidente de la Fundación Valdés-Salas, promotora de la escavación, sorrayó la importancia del afayu pa constatar que nun poblamientu como'l d'Alava, ensin güelga nenguna d'una posterior ocupación romana, los pobladores indíxenes “yá sabíen estrayer l'oru de xacimientos primarios y non solo de los calces de los ríos, onde podría atopase en forma de pebites”.

Rubén Montes ye'l director de campu d'unes escavaciones que la so dirección científica cuerre al cargu de Miguel Ángel de Blas y Ángel Villa. Montes, pela so parte, incide nel afayu “inequívocu” d'indicadores de metalurxa con oru y plata de gran pureza, amás de los metales de base cobre, más habituales. Tamién abonda na importancia d'estos nuevos datos pa siguir perfilando cómo yera esti tipu de sociedaes prerromanes asitiaes nel territoriu que darréu se convirtió n'Asturies.

Güei va entamar una nueva campaña d'escavaciones nel castru d'Alava, asitiáu nuna “magnífica posición estratéxica” na confluencia del ríu Pigüeña col Narcea, como sorraya Lorences. Hasta agora escavárase na zona cumbrera del castru y alcontrárense los arramaos, fora de la muria, de lo que sería'l taller metalúrxicu del pobláu. Agora van buscar, yá nel interior del castru, restos de viviendes.