La histórica baxada del paru que rexistró Asturies en xunetu foi por barrios. O, meyor dicho, por conceyos. Los más turísticos y, polo xeneral, los bañaos pol bravu Cantábricu fueron tamién los que más desacupaos sacaron de les llistes del desempléu. Dalgunos nunos porcentaxes peraltos, perriba del 20%. Nesos conceyos costeros les cayíes doblaron les que se rexistraron nos grandes conceyos del centru de la rexón, por riegla xeneral más dinámicos dende'l puntu de vista llaboral. Tou gracies a una gran campaña de branu que ta enllenando hoteles y restoranes de les esnales asturianes. Namás en xunetu, les oficines del Serviciu Públicu d'Empléu de la rexón restaron 7.194 demandantes d'empléu. Con too y con ello, inda queden 65.165 desacupaos na rexón. 

L'Oriente. Llanes restó en xunetu 148 demandantes d'empléu, lo que vien a ser una cayida del 18,45% en comparanza col mes anterior. Los hosteleros d'esa zona d'Asturies aseguren que la campaña veraniega ta siendo histórica magar les enormes incertidumes por cuenta de les restricciones pa facer frente a la meyora del virus y a les crecientes dificultaes p'atopar nuevu personal. Los conceyos vecinos de Llanes tampoco son ayenos a esi ameyoramientu. En Ribadeva'l descensu foi del 31,94%; en Ribeseya del 21,58% y, yá nel interior, en Cangues d'Onís la baxada llegó al 23,91%. Menos intensu foi'l retrocesu que se rexistró en Villaviciosa, anque algamó'l 11,5%.

L'Occidente. Nesa zona d'Asturies el descensu del paru foi daqué más conteníu que na oriental, pero tolos conceyos baxaron con una mayor intensidá que la media rexonal (–9,94%). En Tapia'l retrocesu foi del 21,88%; en Cuideiru la cayida foi del 22% y en Valdés, más modestu, llegó hasta'l 13,8%.

El centru. Nengún de los grandes conceyos del centru de la rexón llogró amenorgamientos del paru tan bultables como los de los conceyos costeros. Ello ye que solo Xixón (–10,07%) tuvo perriba del descensu mediu rexistráu nel conxuntu d'Asturies. Raspiando, eso sí. 

Los puestos. Hostelería (con 1.360) y comerciu (con 942) fueron les dos ocupaciones que más paraos restaron a les llistes del Serviciu Públicu d'Empléu'l mes pasáu. Tamién soplen bonos vientos llaborales pa la construcción, que d'un mes pa otru descontó 487 desacupaos, mientres el poderosu metal restó 101 y les actividaes sanitaries 118.