La industria asturiana encara'l futuru con optimismu. La recuperación nel sector, pilastra de la economía rexonal, va tomando cuerpu y les perspectives son bien bones, según coinciden trabayadores y empresarios. Especialmente, ente les grandes compañíes. La grosez d'esi ameyoramientu empiecen a enseñalu delles estadístiques, como la de clima industrial qu'ellabora la Sociedá Asturiana d'Estudios Económicos ya Industriales (Sadei). Según esa encuesta, prácticamente tola industria asturiana tien trabayu aseguráu pa los próximos meses. Delles cañes d'esti heteroxéneu sector tienen yá pidíos p'acabar ensin apuros esti inciertu 2021. Asina, l'informe señala que, polo xeneral, la industria tien carga y pidíos alcordaos pa los próximos cuatro meses. Anque, hai rames, como la del metal, que miren muncho más a llargu plazu y tienen asegurada l'actividá pa tou esti exerciciu. 

Tou ello magar les amenaces que son munches. Nesa llista negra figuren los precios de la lluz y los de les materies primeres, qu'anden descomanaos. Anque nesti casu, eso beneficia a ArcelorMittal, que viende agora'l so aceru permuncho más caru que va unos meses, lo que lu llevó a rexistrar unos beneficios históricos. 

Volviendo a la encuesta de Sadei, na que se testa l'estáu de salú de la industria, el diagnósticu ye mui positivu. Un terciu de les compañíes considera que los sos actuales niveles de producción son “elevaos”. Anque'l grau d'optimismu, nesti casu, varia por rames d'actividá. El 80% de los empresarios del metal, trabe del sector industrial asturianu, confiesen que los sos niveles de producción son bien altos y que tienen trabayu aseguráu pa, a lo menos, los 140 próximos díes del calendariu. Al otru llau de la moneda, la industria testil ye la más pesimista. Y la que menos claro tien el so futuru. 

La encuesta tamién apurre perspectives a mediu plazu. El 92% de la industria asturiana estima que los bonos niveles de producción actuales van caltenese nos próximos meses. Tamién hai una proporción relevante, del 22%, qu'asegura que ta esmolecíu porque los precios de les materies primes sigan xubiendo, lo que puede afectar a la so competitividá. Hai grandes empreses de la rexón, como ArcelorMittal, qu'aseguren que plasmaren pola fuerza cola que se ta recuperando la demanda. Agües abaxo, el metal tamién ta notando esi repique de l'actividá. Yá con cierta intensidá, magar la torga de los precios de los materiales. 

“Ta habiendo un repique de la carga de trabayu y tán contratándose nuevos proyectos”, diz el secretariu xeneral de la Federación d'Industria de CC OO, Damián Manzano. Y añede: “Lo que s'espera ye qu'agora los fondos europeos puedan dar un emburrión mayor a l'actividá”. Los últimos datos de producción industrial tamién los acaba de sopelexar Sadei y señalen qu'en xunu l'actividá creció un 16% en comparanza col atípicu mesmu mes del añu pasáu, nel que taben empezando a llevantase les primeres restricciones del confinamientu. Les cifres del paru tamién conseñen l'ameyoramientu. La industria asturiana baxó en xunetu de los 5.000 paraos per primer vegada nos postreros 17 años. El secretariu xeneral de la Federación d'Industria, Construcción y Allegaes (FICA) d'UXT n'Asturies, Jenaro Martínez Paramio, asegura que “esa meyora llaboral traduzse nuna mayor calidá y estabilidá llaboral”.