El patrimoniu sierense axunta un llargu llistáu de magníficos palacios rurales, anque'l so estáu de caltenimientu ye desigual. Dalgunos tan restauraos ya inclusive con diversos usos anguaño, pero otros tán en males condiciones y con un importante deterioru. Con too y con ello, merez la pena facer el percorríu pa visitalos y afayar la guapura d'estos inmuebles o acasu imaxinar la rellumanza que tuvieron qu'enseñar nos sos bonos tiempos.

La “Ruta de los palacios rurales de Siero”, qu'asina se llama l'itinerariu que propón el Consistoriu, suma un percorríu de 25 kilómetros y, en principiu, ye pa realizar en coche si quier facese nuna única xornada. Hai que volver sobre'l camín delles veces si se quier velos toos.

La ruta empieza en La Pola, cola visita al palaciu del Marqués de Santa Cruz de Marcenao, allugáu nel parque Alfonso X. Rehabilitáu, anguaño tien usu municipal y constitúi un exemplu de l'arquitectura palaciega barroca del últimu cuartu del sieglu XVII. De traza cuadrada, coles torres salientes nos llaterales, nun tien apenes decoración.

Santa Cruz, Torre de Vixil, Aramil, Ceis y Lieres, asina son cinco de los grandes palacios rurales de Siero

Dende La Pola tien de tomase la carretera local SI-8 en dirección a Valdesoto y, a unos 4 kilómetros, atópase'l palaciu del Marqués de Canillejas. Ye una construcción del sieglu XVIII, declarada Monumentu Históricu-Artísticu y ye de propiedá privada. 

Hai que dar marcha tras y volver pela mesma carretera hasta un encruz que da la opción de tomar dirección a La Secada pa llegar a la Torre de Vixil, asitiada xusto primero de llegar al pueblu de Santolaya de Vixil. El magníficu inmueble, restauráu, ye una construcción de finales del sieglu XVI o principios del sieglu XVII.

Cerca d'él atopa'l palaciu d'Aramil, na parroquia del mesmu nome y que se data nes décades finales del sieglu XVII. Dende ellí tórnase a la carretera nacional 634 y gárrase dirección a Uviéu hasta llegar al palaciu de Lieres, tamién restauráu. La so execución correspuende a distintos momentos: en parte a finales del sieglu XVI y en parte al sieglu XVII.

Hai que tornar a La Pola pa dende ellí tomar dirección a Ceis. Nel camín vamos atopar el palaciu de Villar y más palantre el de Ceis, ún de los exemplos destacaos del barrocu civil asturianu. 

 Otra vegada hai que volver a La Pola y tomar dirección Uviéu pela Nacional 634 pa visitar l'últimu palaciu de la ruta: el de Meres. Pásense trés rotondes y na cuarta xírase escontra Tiñana. Cruciando un pasu a nivel atópase a la izquierda l'accesu al palaciu, l'orixinal ye del sieglu XV pero reedificáu nel XVII.