El pigargo, l'águila de cola blanca, pariente de l'águila calva americana, volverá esnalar pelos cielos de la Península Ibérica si se completa al cabu'l proyectu de reintroducción que se desenvuelve en Ribadeva, col financiamientu del Gobiernu central y del Principáu. El plan, sicasí, amenó yá'l refugu de distintos grupos ecoloxistes, como ye'l casu de la Coordinadora Ornitolóxica d’Asturies (COA), qu'esixe la so inmediata paralización. Los sos argumentos son dellos. Primero, “nun se dispón de nenguna preba fidedigna” de qu'el pigargo sía una especie autóctona d'España. Segundu, consideren que'l proyectu desarrollóse con “enorme secretismu” y ensin consultar nin a los científicos, nin a les asociaciones ornitolóxiques y a los ganaderos, que podríen vese afectaos. La COA sollerta de que n'esperiencies asemeyaes n'Escocia “rexístrense numberosos ataques de pigargos sobre corderos, lo que provoca un creciente malestar ente los ganaderos”. Finalmente, la COA considera qu'hai otres prioridaes de caltenimientu n'Asturies, y que nun s'analizó de qué manera esti “gran depredador” puede afectar al restu d'especies catalogaes. 

Pero, ¿qué ye esactamente un pigargo européu? L'Asociación Grefa (Grupu de rehabilitación de la fauna autóctona y el so hábitat) ye la encargada de xestionar esta iniciativa y el so director, Ernesto Álvarez, y la bióloga responsable del Proyectu Pigargo, Lorena Juste, compartieron con LA NUEVA ESPAÑA tolos detalles sobre esta especie y del procesu de reintroducción. 

El pasáu llunes 2 d'agostu, el proyectu dio'l pistoletazu de salida en Ribadeva cola presentación de “Pimiangu” y “Mansolea”, dos de les nueve críes de pigargo européu, procedentes de Noruega, que dende entós s'alcuentren nun espaciu d'aclimatación hasta ser lliberaes dientro de dos meses al ecosistema asturianu. Toes elles lleven un emisor GPS incorporáu pa monitorizar los sos movimientos. Toles críes lliberaes son pollos estrayíos de la so población natural en Noruega, la más abondosa de toa Europa, con alredor de 4.000 pareyes. 

“Nestos dos primeros años va facese una valoración de los datos y resultaos llograos, pa dir reaxustando la metodoloxía y valorar l'ésitu del proyectu”, esplica Lorena Juste. L'oxetivu final ye lliberar 100 exemplares nun periodu de 7 años por que s'asiente una población reproductora

Ernesto Álvarez, director de Grefa, esplica que se trata inda d'un proyectu esperimental, yá que tamos delante d'una especie que nunca fuera reintroducida n'España. “Cuando en 2018 s'aprobó'l llistáu d'especies desaniciaes en territoriu español en tiempos históricos, que permitía la so restauración y reintroducción, nun duldamos en ponenos a ello viviegamente, anque la idea teníemosla dende diba más de venti años”, esplica. 

“Si funcionó tan bien n'Escocia, que s'entamó nos años setenta y agora yá tienen una población que se recuperó, ¿por qué nun lo intentar n'España y tener equí un ave tan impresionante y emblemática?”, comenta Álvarez, anque reconoz que les duldes ya incertidume nun falten porque ye una especie cola que Grefa nunca trabayó, pero'l grupu confía en repitir l'ésitu de toles reinserciones d'especies que yá llevaron a cabu. 

Ernesto Álvarez incide en que “cualquier recuperación d'una especie que yá habitara la zona n'otra dómina siempre va ser más positiva que negativa, cuidao que supón la meyora del hábitat y la biodiversidá”. El financiamientu del proyectu cuerre al cargu de la Conseyería de Mediu Rural y Cohesión Territorial y el Ministeriu pa la Transición Ecolóxica y el Retu Demográficu. Amás, el Grupu Grefa tamién tuvo'l sofitu del Gobiernu de Cantabria y del Conceyu de Ribadeva. 

Otra parte bien importante del proyectu ye l'estudiu de les amenaces que se cernen sobre esta especie y qu'atenten contra'l so desenvolvimientu. Lorena Juste señala especialmente la electrocución con tendíos eléctricos. “El proyectu trai una serie d'acciones destinaes al control de les amenaces, vamos facer muncha incidencia sobre la corrección de los tendíos eléctricos, polo qu'esto va beneficiar les poblaciones d'otres especies que se ven afectaes per esti mesmu problema”. Por tanto, una de les principales ventayes ye la meyora global de la naturaleza y biodiversidá de la zona. Tamién ye importante como amenaza, al tratase d'un ave que come carnazu, la intoxicación col venenu utilizáu nos cotos de caza pa esaniciar a los depredadores terrestres. 

Amás del importante beneficiu de meyora de la biodiversidá de la zona, otru aspeutu positivu a destacar del proyectu ye'l beneficiu económicu que, según los sos promotores, puede traer consigo a llargu plazu. “Ye una especie icónica que tol mundu va querer venir ver. N'Escocia, na isla de Mull xenera 5 millones de llibres de beneficiu y 2,4 millones na isla de Skye. La xente local, los hoteles y los restoranes, van poder aprovechar que se trata d'una especie bien atrayente que va llamar l'atención de la xente”, afirma Juste, qu'espera que'l proyectu salga según lo previsto y que “n'España podamos volver ver a esti ave tan carismática”.