Xilberto Llano Caelles ganó cola obra “Boliescritu de primavera” el premiu “María Josefa Canellada” de lliteratura infantil y xuvenil n'asturianu na so decimocuarta edición.
El xuráu destaca na so decisión “el tratamientu de la tema del confinamientu de 2020 dende una perspectiva orixinal y ensin cayer en llugares comunes”, amás de la so “alta calidá lliteraria y el bon usu de la llingua”.
Tamién sorraya l'acta del xuráu “el nivel xeneral calidable de les obres presentaes y la diversidá de perspectives que traten”.
Xilberto Llano Caelles (Arroes, Villaviciosa, 1965) ye llicenciáu en Filoloxía Hispánica pola Universidá d'Uviéu y trabaya como profesional de biblioteconomía.
En 1987, Llano Caelles llogró'l premiu “Xosefa Xovellanos” cola novela “De Corinto, de Grecia”, en 1988 publicó la so segunda novela, “Sencia”, y en 1995 llogró'l “Xuan María Acebal” de poesía con “Silabariu” (1996).
Ye autor de les traducciones al asturianu de les obres “Alicia nel país de les maravíes” (1989) y “L’otru llau del espeyu y lo qu’Alicia atopó ellí” (1992), de Lewis Carroll, y “El relatu d’Arthur Gordon Pym”, d'Edgar Allan Poe.
