El Santu Sudariu, la más preciada reliquia de la Catedral d'Uviéu, ye la estrella del Xubiléu de la Santa Cruz, que se celebró estos díes, hasta'l martes, 21 de setiembre. Nel marcu de la celebración de los 1.200 años de la consagración del primer altar de la Sancta Ovetensis, el cabildru decidió que, en cuenta d'amosar el Santu Sudariu namás'l día de la Esaltación de la Santa Cruz (14 de setiembre) y per San Mateo (21 de setiembre), los díes qu'abren y cierren el Xubiléu, diba enseñase en toles mises de la Perdonanza.
Esta singularidá ta provocando que la Catedral s'enllene pa caún d'estos oficios, y que decenes de fieles queden n'acabando la eucaristía pa venerar el Santu Sudariu, una reliquia qu'aportó a Asturies en dalgún momentu del sieglu VIII, dientro de l'Arca Santa. Pero'l poder amosar el Santu Sudariu nes mises rique, acaldía, d'una cuidadosa operación.
La reliquia custódiase na Cámara Santa, nuna urna diseñada a costa fecha pa garantizar el so caltenimientu. La estructura instalóse nes obres de restauración del relicariu, ente payares del 2013 y abril del 2014. Ye una vitrina climatizada dotada d'una llume especial. Dientro guardase'l Santu Sudariu, que al tiempu ta protexíu por un estoyu microclimáticu anóxicu (ensin osíxenu), con una atmósfera presurizada con argón. Fabricáu n'Eslovenia, esti estoyu ye asemeyáu al que s'utilizó pa caltener “La dama del Armiño”, de Leonardo da Vinci. Ello ye que l'autor de dambos ye'l mesmu: Guillermo Andrade.
El Santu Sudariu tien unes midíes de 85,5 por 52,6 centímetros. Por estes dimensiones y el pesu total del estoyu, 25 kilos, faen falta dos persones pa sacalu acaldía de la Cámara Santa y llevalu al presbiteriu, pa les mises. Pel Xubiléu, encargase d'esta xera Miguel Carbajal, trabayador de la catedral, ya Iván Rodríguez, capataz de la Hermandá de Los Estudiantes d'Uviéu. Ellos son los “guardaespaldes” de la más pervalible reliquia de la Catedral d'Uviéu.
Los fieles aporten en masa a venerar la reliquia
Manuel Sánchez Monge, obispu de Santander, presidió esti día la tercera de les ocho mises del Xubiléu de la Santa Cruz. Un oficiu relixosu que, como nes dos xornaes anteriores, rexistró una carrapotada de fieles, atraíos pola posibilidá de contemplar y venerar el Santu Sudariu, que pela Perdonanza d'esti añu, y nel marcu de la conmemoración de los 1.200 años de la consagración del primer altar de la Catedral d'Uviéu, enseñase en toles mises. A la fin, los fieles pudieron averase al presbiteriu pa orar delantre la reliquia. El cuartu oficiu relixosu del Xubiléu presidiólu Luis Ángel de les Heras, obispu de Llión.
