El Muséu de Belles Artes d'Asturies vuelve a facer medrar los sos fondos pictóricos y escultóricos gracies a l'arrogancia de l'asturiana María Luis Corrada, vilba del conde de Villagonzalo. El depósitu de 34 obres d'esta espectacular colección, que va dexar al muséu esponer obres de maestros internacionales de los que nun disponía hasta la fecha, acaba de medrar en diez obres más que van engrosar los fondos de la pinacoteca asturiana. Son una decena de pintures, escultures y dibuxos, mesmo que pieces d'artes gráfiques y aplicaes, qu'entá van tener que sometese a un estudiu fondu per parte de los espertos del Muséu pa precisar distintos datos alredor de cada obra.
Ente les pieces qu'integren esta ampliación del depósitu orixinal –que parcialmente compón la esposición “Gusto y tradición”, abierta hasta'l próximu día 26 nel palaciu de Velarde– hai una pequena copia del autorretratu de Velázquez, un bustu de muyer obra d'Agustín Pajou, de la segunda metá del sieglu XVII; un retratu de dama atribuyíu a Claudio Coello, delles escultures, un grabáu que conmemora la victoria de Waterloo sobre Napoleón, una cacía y un paisaxe de la escuela holandesa del sieglu XVII que'l so autor entá ta ensin identificar, ente otres.
Esti depósitu fechu por María Luisa Corrada ye, xuntu col que fixo'l Muséu del Prado, el más importante que recibió'l Muséu de Belles Artes d'Asturies. Precisamente n'honor a la relevancia d'esta aportación y a l'arrogancia demostrada pola vilba de Juan Andrés Maldonado y Chávarri, IX conde de Villagonzalo y VIII Marqués de la Scala, LA NUEVA ESPAÑA concedió'l so galardón “Asturiana del mes” a María Luis Corrada, vilba del conde y natural de Santillán (Amieva). Nel actu d'entrega del galardón, lo mesmo que yá fixera cuando se presentaron públicamente les obres nel Belles Artes, Corrada incidió en que col depósitu del legáu qu'heredó del so home ta realmente cumpliendo la so voluntá, pos Juan Andrés Maldonado yera de la opinión que los cuadros tendríen “de tar nos museos, onde los viera tol mundu”.
“Gusto y tradición”, la esposición qu'hasta'l próximu día 26 d'esti mes puede contemplase nel Muséu de Belles Artes, recueye una selección de toles obres depositaes por María Luisa Corrada, que darréu s'integrarán na colección permanente de la pinacoteca asturiana. Na donación sobresal l'aguada de Goya “Maja y Celestina en un paisaje de atardecer”, una pieza de 22x15,6 centímetros pintada pol maestru aragonés a la fin de los sos díes, en 1825. El conxuntu Villagonzalo, que cunta con numberoses obres d'estilu rococó, y toes nun escelente estáu de caltenimientu, axunta importantes firmes de les escueles flamenca, italiana, francesa, austriaca, alemana y holandesa, toes elles relevantes pieces del sieglu XVIII o pintaes a caballu col sieglu XIX.
