La Televisión del Principáu d'Asturies (TPA) estrenó'l xueves, 16 de setiembre, el primer concursu n'asturianu de la cadena autonómica. Esti programa d'entretenimientu familiar va emitise a les 22.30 hores y va cuntar con concursantes conocíos pol públicu asturianu.

En 'La Reválida', cada selmana, trés asturianos del mundu de la cultura, la comunicación o'l deporte van tener que demostrar si recuerden les conocencies adquiríes na so etapa escolar.

Chechu Rubiera, Vicente Díaz, Pola, Maite Capín, Mapi Quintana o Celestino Rozada, van ser dalgunos de los participantes que van ocupar los pupitres de 'La Reválida' pa enfrentase a diverses pruebes que-yos proponga la presentadora, María Cotiello, nel so papel de 'maestra'.

D'esta manera, los alumnos' van tener qu'enfrentase a distintes pruebes sobre les materies que s'imparten na educación obligatoria n'España. Van tar dixebraes en ciclos que van dir progresivamente aumentando la so dificultá.

Cada programa tien cinco pruebes: 'Vuelta al cole', con entrugues incluyíes nos temarios de los cursos 1u a 3u de Primaria; '¿Sabes más qué...?', con temes sacaos de les unidaes que s'imparten nos cursos de 4u, 5u y 6u de Primaria; 'Mañes y Habilidaes', con distintes pruebes de l'asignatura d'Educación física; '¿Qué ye ESO?', sobre les materies de los cuatro cursos que contién la Educación Secundaria Obligatoria; y 'La Reválida' como prueba final de la que va salir el vencedor del programa.

El premiu va ser solidariu, y la persona ganadora de cada programa va decidir a qué entidá o causa solidaria quier destinalo. El concursu tien l'apoyu de la Conseyería de Cultura, Política Llingüística y Turismu cola collaboración de l'Academia de la Llingua Asturiana, según informa EUROPA PRESS.