Un móvil con conexón a internet pa descargar una aplicación gratuita y asitiase énte ún del mediu centenar de mupis espardíos pela ciudá, o visitar les Termes Romanes del Campu Valdés. Ye lo único que fai falta pa conocer la vida del Xixón romanu. Hasta'l 19 d'ochobre va poder afayase, al traviés d'una aplicación de realidá aumentada descargable nel smartphone, cómo yera la vida na ciudá, dende un prisma personal, colos testimonios de dellos personaxes ficticios: el lexonariu romanu Gaio Sulpicio Úrsulo; el caxeru de les termes Primo Aruntino; la vecina de Cimavilla Magnentia, una de les primeres nueves cristianes del Conventus Asturum; el comerciante Tito Pompeyo; y l'ama de llaves que facía d'acompañante de la dueña de la gran Villa de Veranes, Voconia Caregia. 

L'aplicación de realidá aumentada “Xixón Romanu AR” (puede descargase en visitagijon.com o nes tiendes Android o iOS) dexa que, cuando s'escania dende la mesma la imaxe de caún de los cinco personaxes, entame un visionáu nel que cobren vida, pa dir cuntando les sos esperiencies y dibuxar asina dalgunes de les hestories de la dómina pal espectador. Esta iniciativa de Xixón Turismu y la Rede de Cooperación de Ciudaes na Ruta de la Plata, que s'enmarca tamién dientro de los actos de celebración del Día de la Ruta Vía de la Plata, va tar disponible mientres el próximu mes na cai, nes Termes Romanes, y nos próximos díes va xunise tamién la Villa de Veranes. 

“A les sos ordes Gaio Sulpicio Úrsulo, lexonariu romanu”, asina saluda ún de los personaxes a los usuarios de “Xixón Romanu AR”. “Nací na actual localidá d'Uxo, al pie de la Ruta Vía de la Plata, pero la mio infancia trescurrió nel castru de la Campa Torres. La mio familia, como otros habitantes del pobláu, emplegóse a xeitu nel trabayu metalúrxicu”, rellata de siguío'l personaxe que cobra vida nesta aplicación. Tito Pompeyo Peregriniano, pela so parte, toma la palabra pa esplicar que ye “ciudadanu romanu y fíu adoptivu de l'atenta ciudá de Xixón gracies al mio matrimoniu cola bella Terencia”, primero de rellatar con una visión más esterna lo que s'atopó a la so llegada. 

Los conceyales del Ayuntamientu de Xixón Santos Tejón, de Promoción Económica y Turismu, y Manuel Ángel Vallina, de Cultura, participaron esti día na presentación del proyectu, al pie de Paloma García, directora de los Museos Arqueolóxicos de Xixón. Tamién tuvieron presentes Marta Allende, David Sánchez y Ángel Vega, trés de los actores que dan vida a los personaxes qu'asemeyen la vida de los romanos na app. “L'espectador va atopar un relatu interesante de forma axilosa y dinámica”, detallen. 

“Dase un valor añedíu al puxu turísticu de la ciudá”, esplicó Tejón, que punxo tamién en valor el papel de la Ruta de la Plata, una y bones la celebración del so día sirvió como impulsu pa conocer entá más el Xixón romanu. “La utilidá d'esta vía pa usu comercial que-y dieron los romanos llega hasta los nuesos díes”, rellata.