Amplia, variada y bien suxerente programación la que va ufiertar el Muséu de Belles Artes d'Asturies na so programación cuatrimestral de setiembre a avientu de 2021, y que se prensentó esti día n'Uviéu. Firme apuesta polos xenios de vanguardia del pasáu sieglu con esposiciones temporales de luxu ensin escaecer los raigaños pictóricos asturianos col escultor José María Navascués como gran protagonista, más propuestes cinematográfiques, conferencies y un estensu programa educativu

En “50 obres maestres de la Colección Abanca” podrá contemplase dende'l 14 d'ochobre hasta'l 16 de xineru de 2022 el talentu d'artistes como Picasso, Georges Braque, Léger, Kandinsky, Klee, Dalí, Ernst, De Chirico, Miró, Torres-García, Maruja Mallo, Oteiza, Chillida, Millares, Saura, Equipu Crónica, Sicilia, Campano, Broto, Barceló, Leiro o Juan Muñoz. Cubismu, astracción y surrealismu aconceyarán nuna propuesta qu'inclúi visites empobinaes, talleres y conferencies. Diego Cascón, responsable de la xestión artística de la colección y Alfonso Palacio, director del muséu, van disertar sobre ella'l 11 de payares.

“Umbral”, de Navascués.

“Umbral”, de Navascués.

“De Picasso a Duchamp. Estampes de vanguardia” va averar del 19 d'ochobre al 23 de xineru a dellos xigantes del arte del sieglu XX dende un puntu de vista poco vistu: la obra gráfica. Estampes procedentes d'una colección particular que s'averen a una producción poco conocida de dolce de los artistes más significativos de la vanguardia nacional ya internacional: Francis Picabia, Fernand Léger, Pablo Picasso, Georges Braque, Sonia Delaunay, Juan Gris, Marc Chagall, Marcel Duchamp, Max Ernst, Joan Miró, André Masson y Óscar Domínguez. Destaca la presencia de Picasso, Miró y Chagall, artistes que crearon obra gráfica de forma constante y con un altor creativu apareyáu a la pictórica. Laura Baños, Ayudante Conservador d'Artes Industriales y Artes Gráfiques, y comisaria de l'amuesa, va ser quien s'enfuse pelos plegues de la mesma con una conferencia que va pronunciar el 9 d'avientu. 

Cierra la ufierta espositiva un proyectu específicu del artista contemporaneu Javier Riera. “El llugar discontinuu” podrá contemplase dende'l 4 de payares hasta'l 6 de febreru de 2022. La propuesta anicia na idea del llugar como metáfora de los procesos psicolóxicos y afeutivos. La mirada y l'esperiencia, apúntase dende'l muséu, creen el llugar, pero l'atención espárdese nel xeitu de vida actual, eslee la so propia naturaleza y amenorga les sos posibilidaes de ser fértil. Y la esperiencia ta interferida y amenorgada a cánones d'interpretación compartíos, superficiales ya impuestos. La esposición desenvuélvese dende dos elementos principales: una pieza de vídeu y una instalación de lluz y xeometría.

La escultura de Juan Muñoz “Laughing chinese man with mirror”.

La escultura de Juan Muñoz “Laughing chinese man with mirror”.

El “Umbral” de Navascués

La obra convidada traviesa cola escultura “Umbral” los espacios de José María Navascués (Madrid, 1934-Uviéu, 1979). Procedente de la Colección Fundación Juan March, del Muséu d'Arte Astracto Español de Cuenca, dende la pinacoteca asturiana preténdese qu'haya ente la pieza de 1976 un fecundu diálogu cola colección d'arte de la segunda metá del sieglu XX que'l muséu espón nes últimes sales del Edificiu Ampliación. María Soto Cano, historiadora del arte y autora d'un catálogu editáu pol muséu sobre los fondos del autor punxo una conferencia'l 25 de payares titulada “José María Navascués, a través del umbral”, na qu'afondó na obra espuesta nel Edificiu Ampliación.

“Les roses sanglantes”, de Dalí.

“Les roses sanglantes”, de Dalí.

El cine va proxectase nel salón d'actos del Muséu Arqueolóxicu d'Asturies a les 18.00 hores col ciclu “Vanguardies en movimientu”. Programa de mano: “Entreactu” y “Ballet mecánicu”, de René Clair y Fernand Legér, el 3 de payares; “Berlín, sinfonía d'una ciudá”, de Walter Ruttmann, el 10 de payares; “L'home de la cámara” de Dziga Vertov, el 17 de payares, y el 24 d'esi mesmu mes, broche de luxu con “La edá d'oru”, del xeniu Luis Buñuel

Programáronse actividaes destinaes a neños, mozos, families, colectivos con necesidaes especiales y adultos. Y el muséu vuelve a entamar la so actividá colos centros educativos al traviés d'esperiencies didáctiques destinaes a alumnos d'infantil y secundaria y pensaes teniendo en cuenta les temes d'actualidá de la pinacoteca, ensin dexar de llau la colección permanente. Talleres pa families con neños y neñes de 4 a 12 años, otros protagonizaos por ñácaros de 0 a 3 años, visites con audiodescripción y talleres destinaos a neños y neñes con espectru d'autismu conformen un espaciu al que'l muséu siempres emprestó muncha atención.

La nueva cafetería y tienda del muséu, la meyor terraza sobre los teyaos d'Uviéu


Va ser un mirador privilexáu sobre los teyaos del cascu antiguu d'Uviéu, cola Catedral casi al algame de la mano. La segunda ampliación del Muséu de Belles Artes, que la so execución desenvolveráse previsiblemente ente los años 2023 y 2024, inclúi delles novedaes sobre'l proyectu inicial, qu'agora ta encuriosando l'arquiteutu Patxi Mangado. Una de les principales, y más vistoses, ye que tanto la cafetería como la tienda de regalos van tar asitiaes na planta cimera del nuevu edificiu y la cafetería va dar a una terraza, asemeyada a la qu'esiste na actualidá. Va convertise, de xuru, nún de los espacios con mayor atractivu de la ciudá y un aliciente más pa visitar la colección d'arte qu'acueye'l Muséu, que'l so patronatu tamién ta esmolecíu porque la volumetría del nuevu edificiu nun resulte escesiva y ande a la tema cola redolada. Agora'l muséu ta faciendo llabores de treslláu de too almacenao nel actual edificiu de servicios, ente ello más de 2.000 obres d'arte. A principios del próximu añu previsiblemente va tar tou balero yá. Na imaxe, la cubierta del edificiu actual.