El 15 de marzu de 2020, a les 00.00 hores, empezaron n'España 99 díes d'estrictu confinamientu pa tratar de quitanos d'enriba al virus que nos siguía como una mala solombra. Caún encarolo como fue quien. Unos –munchos– enferronándose a una collecha azotada de rollos de papel hixénicu como flotadores contra la olona del Apocalipsis. Otros, más sensatos, buscaron terapies pa soportar tantos díes conventuales que s'averaben. El diseñador burgalés asitiáu en Candás Goyo González escoyó la suya ente lo que lleva años faciendo: “conceptrándose”, pariendo “conceptraciones”, como él les llama, imaxes que son concentraos de conceutu que cuelga casi a diariu nel so blogue. González, con un talentu ilustrao que relluma en más de 150 llibros de testu colos qu'estudiaron millares de mozos de toa España, focalizó les sos conceptraciones na casa, esi llar convertíu en cárcel repentina. Asina que caldía reformulaba la imaxe d'una casa pa mandanos a toos un mensaxe d'ánimu. #Deestasalimos.

Goyo Rodríguez

Goyo Rodríguez

Agora que yá casi salimos, la Comunidad Valenciana escoyó'l llibru “Casas” (editorial Onada), onde González arrexuntó'l so personalísimu diariu de la pandemia, como'l meyor editáu en 2020. Un galardón honoríficu que se va apurrir el Día del Llibru Valencianu, el 20 de payares, nel Monesteriu de San Miguel de los Reis. La obra destila l'optimismu que Rodríguez trató d'inyectar a aquellos díes de ciclotimia nos qu'ora pidíemos el viáticu ora prometíemos, al tiempu qu'aplaudíemos solidariamente, traer por fin la felicidá universal sobre la tierra. Goyo Rodríguez diz qu'al ver agora'l diariu caseru de so surde la entruga de qué foi de toes aquelles bones intenciones. Pos igual sanamos del virus y volvimos enfermar de les nueses miseries de siempre.