José Manuel Bada emigró dende Caravia a América cuando tenía solo 10 años. Empecipió una apasionante carrera que lu llevó a ser reconocíu como'l cronista español ente la colonia americana y a tratase, pola so faceta de críticu, con tolos artistes y los intelectuales de la dómina. 

Prudencio “Pete” García partió con 7 años dende Salinas a Estaos Xuníos, xunto a so madre y hermanos, pa buscar al so padre. Ellí acabó convirtiéndose nel primer árbitru nacionalizáu n'Estaos Xuníos que participó nun eventu internacional de fútbol, el Mundial de Brasil de 1950.

Son dos de los exemplos d'hestories, con imaxes, documentos y una infinidá d'alcordances que los comisarios Luis Argeo y James D. Fernández recueyen na esposición “Emigrantes invisibles. Españoles en EE UU (1868-1945)”, qu'el 18 de payares va inaugurase nel Antiguu Institutu de Xixón. Pero enantes, esti día, nel Muséu del Pueblu d’Asturies, celebróse una actividá bien especial, la “Xuntanza trasatlántica”, na que se buscó axuntar munches más hestories pa incorporales como anexu a l'amuesa. 

Hasta Joaco López, director del muséu, quixo contribuyir apurriendo unes imaxes d'unos primos de los sos güelos, nes que se ve una delegación asturiana nel Centru Asturiana de Tampa (Florida). 

La esposición, que se va abrir al públicu nun par de meses, cuenta con 250 reproducciones d'imaxes, amás d'infinidá de materiales orixinales, como documentos de viaxe, pasaportes, cartes, xiblatos, un morteru o carteres. “Lo que se busca ye xunir otra vuelta una hestoria que taba a puntu de sumir. Los bisnietos d'estos protagonistes munches vegaes nun saben reconocer estos materiales y poner en valor la importancia d'esti caltenimientu”, rellata Argeo, que confiesa tamién que l'amuesa final de 250 imaxes tomóse sobre una base de 10.000, nes que trabayó na última década. 

La “Xuntanza transatlántica” sirvió pa compartir y disfrutar de toes eses hestories colos descendientes de los protagonistes. Yolanda Cerra, de Ribeseya, amosó tol material arrexuntáu de José Manuel Bada. “Foi'l promotor de la primer película hispana falada n'Estaos Xuníos”, apuntó. “Emigró a Cuba con 10 años en 1899, asitió en Nueva York en 1915, y siempre amosó les sos moliciones culturales. Llegó a tar en tolos xareos artísticos, al ser críticu d'ópera, y dexólu entablar relación con Tagore, Valle-Inclán o Caruso, o cartiase con Palacio Valdés”, destacó. 

Luis Argeo señaló tamién qu'esta aventura permitió-y afayar collaboradores perinteresantes, como Ron González. “Ye un nietu d'asturianos, afincáu en Virginia Occidental, que nos apurrió muncho material. Ensin ser d'equí, tresmite una asturianía única gracies a les fabaes y los cancioneros qu'escuchaba a la so güela”, destaca.