La vendimia entamó nos viñedos de la Denominación d'Orixe Protexida (DOP) vinu de Cangas. Como ye tradicional les finques asitiaes n'Ibias fueron les encargaes d'inaugurar la campaña fai unes selmanes, ente que en Cangas la recoyida empezó tímidamente a lo llargo de la pasada. Espérase que'l trabayu intensu nos viñedos se dea a partir de la próxima fin de selmana, yá estrenando ochobre. Ye una fecha un poco más seronda de lo qu'avezaba ser nos últimos años, cuando se falaba de vendimies adelantraes, polo que los viticultores señalen que la collecha ta empecipiándo dientro de les feches que s'embaraxaben y que se tien que considerar dientro de lo normal.
El presidente de la DOP y viticultor, José María Martínez, esplica que'l tiempu del mes de setiembre ye'l que marca l'entamu de la vendimia. Asina, l'agua y los díes borrinosos de los postreros 15 díes nun favorecieron la maduración de les uves, lo que foi retrasando'l momentu más amañosu pa vendimiar. “El tiempu ye'l que manda, el que nos da y nos quita y como vinieron estos 15 díes d'agua aparó un poco la progresión que debería de llevar pa completar la maduración enantes”, analiza.
Díes como esti d'atrás, nos que l'agua da tregua y el sol faise protagonista ente les nubes son los esperaos polos viticultores pa salir al viñéu. La bodega La Verdea foi una de les qu'aprovechó'l bon tiempu col qu'amaneció'l esti día pa dar empiezu a la recoyida de les sos primeres uves. Fízolo nun terrén asitiáu a pocos metros de la bodega que se caracteriza pel so suelu cascayosu y por tar asitiáu de cara al sol, lo que fai que sía ún de los primeros en maurecer. Amás la so producción ye de la variedá albarín blancu, la más temprana de les uves autóctones. El bodegueru Luciano Gómez esplica qu'esti añu empieza la collecha más tarde que los años anteriores, casi dos selmanes de retrasu respecto al añu pasáu. Recuerda qu'en 2020, nestes mesmes feches, na so bodega taba rematándose la campaña de recoyida.
Sicasí, esta circunstancia asegura que nun afecta a la calidá que ta viendo nos sos piños d'uva, qu'un añu más defini como “bien bona”. Daqué que compensa l'añu complicáu al que tuvieron que facer frente con xelaes en primavera y agua pel tiempu del floriamientu. “N'abril vinieron unes xelaes que fixeron amenorgar la producción y cuando la vide taba en flor nun aparaba de llover, cuando nos facía falta que viniera sol, veníanos agua, lo que tamién provocó l'apaición d'enfermedaes”, llamenta.
Estos zarapicos a lo llargo del añu van facer que nun algame l'oxetivu d'aumentar la producción como taba nes sos previsiones esti añu, pero siquier cree que va poder caltener la cantidá del añu pasáu, calculando que, si tou sal según lo esperao hasta rematar la vendimia, pueda collechar 15.000 quilos d'uva. “Fáltanos cantidá, pero la calidá del frutu ye especial, que ye lo qu'importa”, recalca.
El presidente de la DOP coincide en qu'esti añu nun foi fácil pal viñéu y reconoz que les xelaes d'abril fixeron “muncho dañu”. Anque entá ye llueu pa determinar esactamente lo que van suponer nel cómputu total de la producción de la denominación, sí reconoz que delles parceles resultaron bien afectaes. Otru de los momentos de tensión que vivieron los viticultores esti añu llegó en xunu, cuando'l sol se resistió y l'agua foi la protagonista día tres día. “Coincidió en plenu floriamientu de les plantes y esi ye un momentu persensible pal viñéu, pero a la fin fuimos saliendo, pero ensin dexar de mirar al cielu yá que taba'l mieu de qu'a última hora llegaren les nubes de xarazu”, recuerda Martínez.
José María Martínez nun s'atreve a realizar una estimación de la cantidá d'uva que van poder procesar esti añu les bodegues enmarcaes nel sellu calidable. Confiesa que l'oxetivu de la entidá siempre ye siguir creciendo y aumentando el volume de vinu producíu, daqué qu'esti añu s'esperaba visto que s'incorporó una nueva bodega y tamién hectárees de viñéu.
Pero tres los inconvenientes rexistraos mientres l'añu espérase qu'eses nueves incorporaciones sirvan pa compensar les perdes de frutu y faigan que la producción de la DOP se caltenga como años anteriores, con unos 120.000 kilos d'uva metíos en bodega. Nesti sen, la DOP na actualidá compónenla ocho bodegues: Monasterio de Corias, Antón Chicote, Vides, Vitheras, Señorío de Ibias, Las Danzas, La Verdea y Siluvio, que s'axuntó esti añu; amás tien 48 viticultores y 55 hectárees de viñéu.
L'actividá nos viñedos acaba d'empezar y a lo llargo de les próximes selmanes dirá intensificándose hasta bien entrada la metá del mes d'ochobre, cuando s'espera que pueda cerrase la vendimia. L'esixente trabayu manual que rique la recoyida d'uva nes zones de monte, amás de respetar los tiempos de maduración de les distintes variedaes son les característiques que faen que se deban cuntar con delles selmanes pa poder dar por rematáu'l trabayu.
La DOP ta incluyida dientro de la denominación de viticultura heroica, que da idea de lo trabayosa que ye la producción de vinu na zona. Lo arrimao de les parceles fae que'l trabayu tenga de ser manual y poro, bien esixente pa los vendimiadores. Amás, les parceles de viñedos son polo xeneral de tamañu pequenu y atópense espardíes pel territoriu, lo que fai que poles característiques particulares de caúna de les sos situaciones tengan tiempos de maduración distintes, polo que ye clave facer un trabayu analíticu previu pa confirmar el momentu óptimu de la recoyida. Ende tamién inflúi la variedá de la uva siendo les más tempranes albarín blancu y verdejo negru y la postrera en recoyese la carrasquín, siendo les entemedies mencía y albarín negru.
