L'arte contemporáneo entra na Catedral d'Uviéu con toles bendiciones nel añu en que'l templu conmemora'l so 1.200 aniversariu. El Cabildru y el Conceyu d'Uviéu cooperaron na esposición “El Salvador y los doce apóstoles”, qu'esti miércoles, 6 d'ochobre, a les 13.00 hores, va inaugurar Miguel Ángel Lombardía (Sama de Llangréu, 1946) na Capiya de los Vigiles de la Catedral, apocayá restaurada. Tamién sofitaron esta esposición, d'un xeitu o d'otru, el Muséu de Belles Artes d'Asturies, la Universidá d'Uviéu, la Fundación Foro Xovellanos y el Real Institutu d'Estudios Asturianos (Ridea). 

Contra la blancura de les parés, sobre una estructura metálica afitada espresamente pa la ocasión, cuelguen yá cinco de los venti apostolaos que salieron del pincel del artista nestos dos últimos años, toos apinaos de coloríu. Ente unos trabayos y otros, Lombardía caltuvo vivu l'interés por recrear les imaxes de Xesucristo y los sos discípulos, investigó y estudió, volvió una y otra vez al mesmu asuntu y reinterpretó una tema qu'empericotió a maestros como El Greco o Rubens. 

“L'Apostoláu surdió nuna conversación na mio casa na primavera del 2019 col comisariu de la esposición, Gabino Busto, conservador del Muséu de Belles Artes”, recuerda Lombardía. Busto, comisariu de la esposición, ye autor d'un estudiu sobre l'Apostoláu del Greco y l'artista entregóse a la so llectura con devoción. Pasaos seis meses y dempués de 222 dibuxos previos, empezó colos cuadros a color, dende xineru de 2020 hasta febreru d'esti mesmu añu.

Miguel Ángel Lombardía

Miguel Ángel Lombardía

Miguel Ángel Lombardía cuenta que revisó y adicó con atención los apostolaos de los pintores clásicos y que'l so enfotu foi siempre “amosalos lo meyor posible, y calteniendo la so personalidá”. De lo muncho que creó nel so estudiu mientres aquellos meses fixo una selección: cinco apostolaos, compuestos por 65 cuadros. “Sería apolmonante ver les 260 pintures y 222 dibuxos que fixi, d'esta forma puede vese un resume y nel catálogu puede aportase a tol corpus y al desenvolvimientu del trabayu”, almite'l pintor. 

La fecha yera aparente. Al aniversariu de la Catedral axúntense los 75 años que cumple Lombardía esti añu. A estes altures, el so arte, como él mesmu esplica citando al director del Ridea, Ramón Rodríguez, “ye cada vez más primitivu y cada vez más fondu”. Rodríguez robla ún de los artículos qu'abren el catálogu de la esposición. Tamién contribúin colos sos testos el presidente del Principáu, Adrián Barbón; l'Alcalde d'Uviéu, Alfredo Canteli; el deán, Benito Gallego; el Rector, Ignacio Villaverde; el director del Foro Xovellanos, Ignacio García-Arango; el director del Belles Artes, Alfonso Palacio, y la directora de la Fundación Lombardía, Margarita Alonso

Miguel Ángel Lombardía conecta los sos apostolaos col de la Cámara Santa, “una ayalga del prerrománicu”, sorraya. El suyu quier ser, diz, “un Apostoláu bien humilde”. Quixo atenese a les dimensiones de los apóstoles del Greco, non más de 74x52 centímetros; dalgunos en forma de tondo –arrondada– y usando técniques distintes, “con cares bien espresives, pero figures más oníriques”. 

Con Lombardía entra na Catedral d'Uviéu l'arte contemporáneo. “Nel so momentu les catedrales yeren los llugares onde la xente allegaba y elles traxeron la modernidá”, comenta. Agora, cola so esposición, vuelve asoceder lo mesmo. Na maxestosa capiya de los Vigiles los sos cuadros van tar espuestos hasta final d'añu, a lo menos. Más palantre, avanza l'artista, cuenten esponese nel centru multiusos que la Ilesia quier construyir na parcela del martiellu de Santa Ana

Luis Antonio Suárez y Cuco Galán ocúpense estos díes del montaxe de la esposición, na qu'amás de los cinco apostolaos amosárense dalgunos de los dibuxos y estudios previos que l'artista fixo d'ellos.