“El paisaxe nun ye lo que ta sinón lo que se percibe”. Sobre esa premisa llevantó l'artista Adolfo Manzano la instalación “Evoluciones y requexos” qu'esti día s'inauguró na sala d'esposiciones d'As Quintas, n'A Caridá. 

Tou empieza con un cuadru que cuelga nel Museo del Prado, el “Paisaje con san Jerónimo”, de Joachim Patinir, de principios del sieglu XVI. “Ún de los primeros cuadros paisaxísticos que se conocen”, apunta Manzano. Patinir pintó a San Xerónimo nuna pequena cabana construyida nuna cueva, el santu ocupa solo una pequena porción del llenzu, el restu ye paisaxe. 

Pa Manzano el paisaxe “tien más que ver cola percepción del que lu contempla que cola realidá”. Esto ye, “nun ye un llugar, nun ye esi sitiu de vacaciones o descansu”. “La cultura puede crear nueves realidaes, camudar la nuesa percepción y la realidá”, esplica l'artista, y ye lo qu'asocede cola plástica. “Enantes de l'apaición de les artes plástiques nun esistía'l paisaxe sinón el país, ye la mirada artística lo que convierte esi país nuna ellaboración cultural y estético, un paisaxe”, desenvuelve Manzano. Y ye bien suxetivu porque delantre d'una mesma realidá, de la que l'espectador solo contempla un fragmentu, “cada persona ve'l so propiu paisaxe”. 

¿Cómo llevar tou eso a una sala d'esposiciones? Con una instalación que consta de dos elementos, una gran estructura de madera de castañu y 136 cuadros arrexuntaos faciendo un mural; 136 paisaxes dientro d'esa alegoría de la cabana de San Xerónimo que ye la estructura de madera transitable que va habitar el visitante. 

Como'l paisaxe tien que ver colo qu'ún contempla, toos estos paisaxes del mural, esos 136 cuadros, nun tienen unidá estilística. “Dacuando, cuando contemplamos un paisaxe, tamos más escuros, otros díes podemos tar más ‘poperos’, o con una visión más astracta o espresionista”, asegura l'artista. El chisgu al San Xerónimo tamién puede vese nesos cuadros. Nún d'ellos apaez una calavera y n'otru un lleón mancáu, atributos del santu.

Un aspeutu de la esposición d'Adolfo Manzano n'A Caridá. | Tania Cascudo

Tou esi mural ta “interferíu” pola construcción de madera. “La persona qu'entra na esposición habita esa cabana y conviértese en San Xerónimo”. L'espectador ye parte de la obra porque “si nun hai persona nun hai paisaxe”. Y como esi paisaxe que caún ve nun ye más qu'un fragmentu de la realidá, tampoco ye posible contemplar d'un solu guelpe de vista la totalidá del mural de Manzano.