Na iconografía de Forges, el ventanucu ye l'escudu impenetrable del funcionariu públicu. El tiempu y l'espaciu reboten escontra esi muriu burocráticu, paradóxicamente de vidriu tresparente. Mientres la pandemia, el teléfonu tomó'l relevu como fueyu de defensa del castiellu de l'alministración. En munchos casos, llograr una d'eses cites previes qu'había que solicitar pa llegar a la fin esfayecíos a cualquier serviciu públicu –especialmente al sanitariu– poníanos enfermos. El Principáu acaba de reactivar l'aplicación telemática pa pidir cita nos centros de salú y abulta que les peticiciones empiecen a fluyir. Atrás queden meses de pacientes atrapaos nun bucle de llamaes comunicando. Sicasí, l'usu del teléfonu como escudu contra'l ciudadanu entá nun sumió en tola alministración. Y hai quien tarrez que nun lo vaiga a facer.

En meses pasaos, repitiéronse situaciones como la que sigue. En xunu pasáu, una madre xixonesa –llamémosla Sandra pa esconder la so identidá– vio cómo'l so fíu de cinco años empezaba a tener lo qu'abultaba ser una crisis d'asma. Ende empezó la so llarga relación col teléfonu. La madre llogró “dempués de 60 o 70 llamaes” contactar col so centru de salú. A la fin, una voz díxo-y: “va llamate'l médicu”. Cosa que se produció al otru día. La madre, necia, quixo que quedara constancia de que'l sistema nun funcionaba y decidió presentar una quexa. Nun sabía que diba entamar un viaxe d'un teléfonu de l'alministración sanitaria a otru hasta qu'atopó ónde tenía que presentala, n'Atención al Paciente. Pero afayó que, si quería presentala, podría facelo en persona o llevando yá redactáu un documentu qu'había descargar nun llugar non especialmente accesible de la web. Sía que non, enantes tenía que solicitar otra vuelta una cita previa. Y eso yera, tal que taben les coses, otra mañana colgada al teléfonu. L'escudu telefónicu funcionó a la perfección. Arrenunció.

Namás 30 segundos

El binomiu “llamada-cita previa” funcionó perfecta y implacablemente pa los pacientes. Pero tamién pa los médicos. Va dos selmanes, un doctor asturianu mozu, que vamos llamar Fernando pa despintar la so identidá, allegó a un centru de salú de les Cuenques a presentar un documentu de méritos. Llegó a les 11:45 hores y atopó un alministrativu perfectamente avagosu que bien podía recibir el papeléu. Sicasí, l'emplegáu públicu riñó al ciudadanu porque nun pidiera cita previa y alvirtió-y de qu'a les 12, quince minutos dempués, tenía a daquién citáu p'atender. Fernando solo quería apurrir el papel. Namás. Con 30 segundos bastára-y. L'alministrativu diba tener 14 minutos y 30 segundos pa siguir esperando. 

El covid obligónos a programanos al milímetru p'axustanos a toes nueses cites previes. Nes biblioteques de Xixón, por casu, hai que solicitar telefónicamente un día y hora p'allegar a por un llibru. Y eso nun país onde les biblioteques públiques nun tán especialmente atarraquinaes. 

Gracies a la pandemia, la burocracia ta empezando a dar dos vueltes sobre ella mesma. N'Uviéu, los padres que quieran apuntar a los sos fíos na escuela municipal d'artes plástiques Taller 3 tienen que, primero, solicitar per teléfonu cita previa pa recoyer los impresos de preinscripción. Depués, una vegada rellenaos, volver llamar y llograr una cita previa pa presentalos. Si l'alumnu ye almitíu, otra vegada toca llamada pidiendo cita previa pa presentar el xustificante de pagu que formalice la matrícula. El consuelu ye qu'atienden al teléfonu con cierta facilidá.

Ún de los niveles más elevaos de virtuosismu algamóse na piscina municipal de Llaviana, non apta pal que careza d'espíritu prusianu. Primero fai falta cita previa pa dir nadar. A partir d'ehí, manual d'instrucciones: aportar a lo más 5 minutos primero de la cita; nel vestuariu, máximu 5 minutos de permanencia enantes de nadar y 10 minutos dempués de facer deporte. Si se llega tarde hai qu'esperar, consumiendo'l tiempu “reserváu”. Tien que s'esperar a qu'entren los cursillistas: xente de cursinos y nadadores “llibres” van por separao.

Calcar un botón

Los sindicatos de los funcionarios aseguren que l'esbarafuste que se creó nos centros de salú debióse a que, al llegar la pandemia, anulóse'l sistema telemáticu pa consiguir cita y púnxose en marcha un centru de llamaes (call center) que foi progresivamente esmantelándose al aparrar el virus. Como la midida de llindar al máximu'l contactu y primar l'atención telefónica se caltuvo, la carga burocrática enchió a unos alministrativos con centralites obsoletes, dicen los sindicatos. Foi reactivar l'aplicación telemática, calcar el botón, y l'asuntu empezó a fluyir. 

El colapsu de les cites na pandemia non solo se produció nos centros de salú. Tamién, y sobremanera, nel Serviciu Públicu d'Empléu (SEPE). Yera imposible contactar telefónicamente –y solo había esa vía– pa qu'esti serviciu estatal pudiera tramitar tolo relativo a los numberosos ERTE que se producieron pol impactu del virus. Nes oficines d'Uviéu, los vixilantes de seguridá tuvieron que soportar más d'un cabréu de ciudadanos apuraos que decidieron dir en persona a que los atendieren. 

A midida que les restricciones sanitaries vaigan decayendo, suponse que l'accesu va ser más fluyíu. Sicasí, los sindicatos avisen qu'en dellos servicios hai ordes de derivar a los ciudadanos p'hacia l'atención telemática o con cita previa, anque casi tola plantiya funcionarial reincorporara prácticamente al puestu. Tal ye'l casu, dicen les mesmes fontes, del Institutu de la Seguridá Social n'Uviéu, onde se dan cites a dos meses vista y encamiéntase a quien se presenta ellí a tramitar prestaciones sociales, pensiones o a inscribir a un fíu con vistes a les ayudes, a qu'acuten día y hora per teléfonu o vía telemática. Los sindicatos alverten que non tolos usuarios tienen los medios o les conocencies dixitales pa poder aportar, finalmente, a un serviciu pol que paguen impuestos. Nestos casos, y en munchos más, queda claro que'l teléfonu y los ordenadores sirven pa desconectanos de la realidá.