Domingo Gabarri nació y creció nel Ventanielles de los años sesenta del sieglu pasáu. Miembru d'una familia xitana de diez hermanos, el so tempranu interés pola cultura convirtiólu nun “rara avis” de la so redolada. “Quiciabes foi porque la mio casa taba al llau del colexu”, comenta con una sorrisa na boca. A los 17 años dexó los estudios “pa llevalo a casa” y púnxose a trabayar. Mientres un cuartu de sieglu foi vendedor ambulante nel Fontán, ocupación que dende 2012 compatibilizó colos estudios de Derechu. La so graduación en 2017 foi sonada polo peculiar del so casu, pero agora pretende dir más allá cola publicación de la so primer novela “Nazis y gitanos”, que tuvo una gran acoyida nes plataformes dixitales. “¿Quién me diba a dicir que sería ‘best seller’?”, pregúntase con humor. 

Fai un par d'años abandonó'l so puestu de llencería del rastru uvieín en busca d'otres salíes llaborales. L'abogacía nun lu llamó muncho. “Nun tengo edá pa montar un despachu, anque asesoro a muncha xente en temes llegales”, indicó. La pandemia pillólu pel mediu y el confinamientu convirtióse nun caldu de cultivu perfectu pa dar rienda suelta a la so capacidá lliteraria. “Nun me gusta dar conseyos, yo soi más de dar exemplu y coles mios acciones solo busco la integración”, diz en relación a la so principal motivación pa siguir rompiendo barreres. 

“Nazis y gitanos” ye'l títulu pensáu pa captar l'atención d'una novela de ciencia ficción al traviés de la qu'empobina a distintos públicos. “Una parte ta discurrida pa calar ente los xitanos y l'otra pa los que nun lo son”, diz en relación a la hestoria de Pablo Vázquez, un xitanu de Madrid con ganes de vengación pol asesinatu en Francia del so bisagüelu a manos d'un oficial nazi. Según confiesa, la inclusión d'un argumentu con referencies al III Reich inclúi tamién un fin comercial. “Ye una tema que siempres atrai al llector”, comenta enseñando una determinada visión de negociu. 

El llibru salió a la vienta en formatu electrónicu al traviés d'Amazon el pasáu 8 de setiembre. Nun día namás les vientes, por un preciu de 0,89 céntimos disparáronse en dellos países. L'ésitu llevó al xigante de la loxística a ufiertalu por unos 15 euros en papel fai unos díes. “Como vendí munchos pónenme la etiqueta de ‘best seller’ na portada”, indica mientres amuesa la carátula na que tamién sal la so fotografía. 

L'autor ye quien a recitar de memoria tou'l conteníu d'un llibru que na so segunda metá da un xiru total a la hestoria. Aparcada la sede de vengación, Pablo Vázquez céntrase en conquistar al so gran amor, una actriz moza afincada en Barcelona. Pa ello nun dulda n'enguedeyase na producción de la so propia película, una estratexa cola qu'espera metéla nel bote. “El final ye bien guapu”, anuncia ensin entrar en detalles sobre'l que de xuru va ser el primeru de munchos trabayos. “Yá tengo dellos en mente”, amenaza. 

Tiempu nun-y va faltar a Gabarri, porque anguaño ta baxu mínimos a nivel llaboral. Él foi ún de los casi 70 operarios que participaron nel plan d'empléu pa recuperar el Naranco, rematáu'l pasáu 30 d'agostu. Agora, el xurista xitanu de Ventanielles volvió temporalmente a los sos oríxenes vendiendo los domingos nel rastru de Xixón. 

La so principal pasión ye, sicasí, ver como'l pueblu romanín avanza progresivamente escontra la integración. “Cuando veo a un xitanu nel institutu emociónome, y cuando lu veo na universidá, directamente echo a llorar”, confiesa, entusiasmáu pol fechu de tener a tres sobrinos estudiando Maxisteriu y un cuartu opositando pa convertise en comisariu de la Policía Nacional na provincia de Barcelona.